南音《客途秋恨 (上卷)》卡拉OK 新馬師曾版本 粵曲 (Cantonese Opera Karaoke)
HTML-код
- Опубликовано: 8 фев 2025
- 客途秋恨 (上卷)
版本: 新馬師曾 (鄧永祥 1916 - 1997)
==
【起南音長序】
涼風有信 秋月無邊
虧我思嬌情緒 好比度日如年
小生繆瑾乃係蓮仙字
為憶個多情妓女 嗰位麥氏嘅秋娟
見佢聲色與共性情 堪我讚羨
佢重更兼才貌兩雙全
今日天隔一方與佢難見面
是以孤舟愁寂 對住晚景涼天
睇下夕陽對住重有對雙飛燕
虧我斜倚在篷窗 我重思悄然
我耳畔又聽得秋聲桐葉落
又只見平橋衰柳 鎖住寒煙
我呢種情緒悲秋同宋玉
況且在客途抱恨 你話對乜誰言
正系舊約、舊約難渝潮有信
新愁深似海闊無邊
唉第一觸景更添情懊惱
虧我懷人愁對 呢個月華圓
又記得青樓邂逅 嗰一晚中秋夜
我共佢並肩攜手 重拜月嬋娟
唉我亦記不盡、記不盡許多情與義
總系纏綿相愛 又復相憐
姐呀共你肝膽、肝膽情投 將有兩個月啦嘛
又嚸想同群催趲叫我整歸鞭
嗰陣幾回眷戀 共你難分捨
都只為緣慳嗰兩個字 共你拆散段離鸞
唉嗰陣淚灑西風紅豆樹
情牽古道白榆天
嬌呀你杯酒、杯酒臨歧 你話同我餞別
在嗰處望江樓上 重設離筵
你重牽衣摯囑 講及嗰段衷情話
叫我要存終始 叫我兩心堅
唉今日言猶在耳 點想成虛負囉
屈指如今又隔年
自古話好事多磨 正係從古道
半由人力半由天
是以風塵閱歷崎嶇苦
佢雞群混跡暫且從權
恨我請纓未遂終軍志
駟馬難揚祖逖鞭
只學得龜年歌調嗰段唐宮譜
遊戲文章賤賣錢
只望裴航玉杵 共你諧心願
藍橋踐約去訪神仙
嗰陣廣寒宮殿無關鎖
何愁好月不團圓
又點想滄溟鼎沸鯨鯢變
嗰啲妖氛漫海動烽煙
是以關山咫尺 今日成千里
縱有雁扎魚書 總渺然
今日聽得羽書馳牒報
又話干戈撩亂擾江村
嗰陣崑山玉石也遭焚毀
好似避秦男女入桃源
嬌呀你紅顏命薄定會招天妒
重怕啲賊星來犯個月中仙
唉嬌花若被狂風損
玉容無主 你話倩乜誰憐
又怕幽蘭不受嗰啲污泥染
你一定拼送香魂玉化煙
唉若然艷質遭兇暴
我願同埋白骨伴姐妝前
或者死後得成連理樹
重好過生前長在奈何天
重有慈航法力共你行方便
又把楊枝甘露救出火坑蓮
等你劫、劫難逢凶俱化吉
嗰啲災星魔障兩不相牽
虧我心似轆轤千百轉 空眷戀
嬌呀但得你平安我就願囉
任得你天邊明月照向別人圓
==
#客途秋恨 #南音 #新馬師曾 #粵曲卡拉OK #粵曲 #卡拉OK #鄧永祥
(客途秋悢)新馬師曾獨唱.58年錄音唱片曲.
據曲藝界老前輩高國華老師說.當年錄音此曲時.祥哥特別要請嶺南箏樂家盛獻三前輩.任彈箏音樂拍和.
盛獻三老佈63年在土瓜灣(大漢藝術書院)教授箏樂科.我也見過盛老師二次.當年乙也很大.
在這南音曲中.可欣賞到祥哥精湛唱腔.也可欣賞盛老師的箏藝🎉🎉🎉