Desafío

Vivimos nunha terra inzada de encrucilladas,
cuadrivios ou "catrocamiños",
eses puntos de incerteza e de casualidade
(ás veces, as cancións tamén transitan esas dúbidas
antes de mutar á forma na que as coñecemos),
mais é tamén verdade que hai encontros inevitables,
coma os das augas dos regatos que se confunden nos ríos
ao chegar á baixa dos vales.
Somos urdime dun cesto que garda músicas compartidas dende hai tempo.
Guille e Guadi, Xabier e Xosé Lois; Guille e Xosé Lois, Guadi e Xabier.
Foron tantas as partillas que decidimos ordenar
esta nosa multiplicidade
e converter esas duplas e triplas encarnacións en cuarteto,
á forma tradicional: Os Beatles, Os Gaiteiros de Soutelo...
Guillerme Fernández, Guadi Galego,
Xabier Díaz e Xosé Lois Romero
ou como os viaxeiros ás veces tropezan na encrucillada
iso si, recoñecendo que saímos en tempo e velocidade axeitados para
nos accidentar neste encontro.
Imos sentar e facer unhas cancións antes de continuar camiño!
Desafío
Música: Guadi Galego, Xabier Díaz, Guillerme Fernández, Xosé Lois Romero.
Letra: Guadi Galego.
Entrei con un desafío
só quería verte despertar
Os pés xa facían ruido dende o outeiro
do outro lugar.

O soto daquela casa
era como un pazo de cristal
Todo luz naquela noite
e eu non deixaba de danzar.

Violas de madrugada
a banda sonora dos portais
As ruas de compostela
non deixaban de ficar atrás.

Comboios e máis comboios
e nunca pararon repostar
O teu chamado silenzo
e o meu non podo nen lembrar.

O tempo pasou sen ritmo
eu buscando o paso pra chegar
A ruta non me atopou
e a danza soa rematou.

Agora xa non te busco
só agardo poder atopar
os anos que alá quedaron
e os que me quedan por chegar.