ЭРЭЛХИЙЛЭГЧ ПОДКАСТ Гуравдугаар дадал : ТЭМДЭГЛЭЛ ХӨТЛӨХ. YEO BYEONGMU Түүхч, Коуч, Багш оролцлоо

(Миний санал болгож буй үзэх хурд 1.25x Энэ нь таны цаг завыг хэмнэх юм бол уу?)
Эрэлхийлэгч Подкаст энэ удаа төдийлөн яригдаад байдаггүй сэдвийг барьж аваад нухаж байгаа. Хамгийн гол нь өөрөө хийдэг зүйлсээ үлгэр болгон эрхэм хүмүүстэй ярилцах замаар таны тархи толгойнд нэг жижиг судас бие болгох зорилготой хийгээд эхэлсэн дэмжээрэй🙏
Энэ удаагийн зочин
Yeo Byeong Mu / bmyeo
1967 онд БНСУ-ын ГёнСан аймагт төрсөн. Монголд эхнэрийн хамт амьдардаг. 3 хүүхэд нь Солонгост ажиллаж, амьдардаг.
1983 онд Сөүл хотын Хан Йөн ахлах сургуулийг дүүргэж, улмаар Хангүг гадаад хэлний их сургуулийн түүхийн ангийг төгссөн.
1993 оны хавар Монгол улсад айлчлан ШУА-ийн Хэлний хүрээлэнд жилийн туршид монгол хэлний сургалтад хамрагдсан бөгөөд 1994.09-1996.12 хугацаанд ШУА-ийн Түүхийн хүрээлэнгийн докторантурт суралцсан.
1993 оноос нэг жилийн хугацаанд МУИС-ийн Монгол хэлний тэнхимд солонгос хэлний багшаар ажиллаж байгаад, 1994-2024 он хүртэл Олон Улсын Улаанбаатарын Их Сургуулийн Солонгос хэл соёлын тэнхимд багшаар ажилласан. Тус сургуульд 30 жил солонгос хэлний багшаар ажиллахын зэрэгцээ 17 жил нь алба, хэлтсийн даргаар ажилласан. Тухайлбал, энэхүү хугацаанд номын санч, Солонгос хэлний багш, орчуулагчийн тэнхимийн эрхлэгч, Сургалтын албаны дарга, Оюутны албаны дарга, Төлөвлөгөө хяналтын албаны дарга, Гадаад харилцааны албаны дарга, Солонгос судлалын төвийн дарга зэргээр ажилласан. Үүнээс гадна Улаанбаатар 1 Сэжон Хагдан сургалтын төвийн даргаар ажиллаж байсан. 1999 онд Монгол дахь Солонгос хэлний багш нарын холбооны тэргүүн, 2017-2019 онд ОУУБИС-ийн Смарт сургалтын хорооны гишүүнээр ажилласан. 2014 оны 12 сард гадаад улсад солонгос хэл соёлыг дэлгэрүүлэхэд оруулсан хувь нэмрийг үнэлж БНСУ-ын Соёл биеийн тамир аялал жуулчлалын яамны өргөмжлөлөөр, 2015 оны 4 сард Олон Улсын Улаанбаатар Их Сургууль үүсгэн байгуулагдсаны 20 жилийн өргөмжлөлөөр тус тус шагнагдсан. Харин 2005 онд БСШУЯ-ы хүндэт жуух бичгээр шагнагдсан.
Yeo Byeong Mu-гийн судалгаа, шинжилгээний ажлын үр дүнг хэвлүүлэн гаргасан бүтээлүүд нь илтгэнэ. 1994 онд “Солонгос-Монгол хэлний товч толь”-ийг анх зохион гаргасан ба түүнийгээ байнга сайжруулан хэвлүүлсээр 2000 онд “Солонгос-Монгол хэлний толь бичиг”, 2004 онд “Монгол-Солонгос хэлний толь бичиг” зохион гаргасан. 2014 онд “Сэжон Солонгос хэл” гарын авлагын 4 дэвтэр, 2015 онд “Солонгос-Монгол мэргэжлийн үг хэллэгийн орчуулгын толь бичиг” зохион гаргасан. Эдгээр толь бичиг, гарын авлагаас гадна олон тооны түүхийн болон солонгос хэлний холбогдолтой нэг сэдэвт бүтээл хэвлүүлэн гаргасан.
Yeo Byeong Mu нь солонгос хэл, соёлыг зөвхөн өөрийн сургууль дээр түгээхэд анхаараад зогсохгүй Монгол улсын хэмжээнд солонгос хэлийг сонирхогч бусад оюутан сурагч, энгийн иргэдийн идэвх чармайлтыг дэмжиж, мэдлэг чадварыг сорих үүднээс 2007 онд “Хангылъ үсгийн наадам”-ыг анх санаачлан зохион байгуулсан ба өнөөг хүртэл жил бүр солонгос дуу, солонгосоор зохион бичих, бийрэн бичиг, солонгос хоолтой танилцах, солонгос үндэсний хувцас өмсч зураг авхуулах зэрэг үйл ажиллагаанаас гадна солонгос эрдэмтэн багш нарын лекц семинар зэрэг баялаг хөтөлбөр бүхий солонгос хэл, соёлын наадмыг тэнхим сургуулийн багш, ажилчдын хамт зохион байгуулж байна.
2006 оны 5 сар БНСУ-ын Но Мү Хйөн ерөнхийлөгч Монгол улсад айлчлахдаа Улаанбаатар их сургуулийн багш оюутнуудтай уулзалт хийсэн. Тухайн үед БНСУ-ын Эх хэлний хүрээлэнгийн захирал Ли Сан Гью дагалдан ирсэн ба тус сургуулийн харьяан доор Солонгос хэлний сургалтын төв нээх саналыг тавихад Yeo Byeongmu ажил хэрэг болгон холбогдох материалыг бүрдүүлж, Улаанбаатар 1 Сэжон Хагданыг байгуулан анхны даргаар томилогдон амжилттай ажилласан нь эдүгээ олон улсад солонгос хэл, соёлыг түгээхэд хувь нэмрээ оруулж буй олон Сэжон Хагдан байгуулагдах анхны хараацай нь болсон юм.
Түүнээс гадна 2014 оноос Зүүн Хойд Азийн Түүхийн хүрээлэнтэй хамтран Монгол улсын Нийслэлийн ЕБС-ийн монголын түүхийн багш нарт зориулж “Солонгосын түүх” сэдэвт сургалт, семинарыг жил бүр зохион байгуулж хоёр орны түүхийн хөгжилд хувь нэмрээ оруулсан. Мөн 2020 онд Монгол дахь БНСУ-ын элчин сайдын яамнаас санаачилсан гадаад улс оронд Солонгосын хэл соёлыг таниулан дэлгэрүүлэх ажилд гавъяа байгуулсан их үйлстэн шагналд нэр дэвшиж байсан билээ. Ийнхүү 30 жилийн турш ажилласан боловсролын байгууллагаасаа гарсан хэдий ч одоо үргэлжлүүлэн Монголын оюутан, залуусын боловсрол руу чиглэсэн дараагийн шинэ ажлаа хийхээр бэлтгэж байна.