Алдарт Босоо хээрийн өчил

Монгол улсын уяач Хөхийн Сүрэнхорол цуут ажнай хээр азарганыхаа хадагтай толгой тэврэн, уй гунигаа дааж ядсаар Хэрлэн Тооно уулынхаа тахилгат овоо руу өгсөж явна.
Энэ л уулын хормойд босоогоороо унасан унаган хүлэг минь.
Миний хээр ажнай намайгаа өршөө:
Би юунд эх нутаг, ижил сүргээс чинь тийш нь хөтлөв.
Уул нь:
Түмэн олнынхоо сэтгэлийг бодож,
Төрийнхөө их наадамд тоосыг чинь өргий гэж л тийш нь хөтөлсийн. Долоохон насанд чинь.
Очиж очиж хүйтэн төмөр хөлчүү хүмүүсийн гарт үрчих ч гэж дээ.
Одоо би, нялх хөөрхөн үр төл, ижил олон сүргийн чинь барааг яаж харна.
Их тоосоо хөрвөөж жаргадаг Дэлгэрхаан нутагт чинь яаж түвшин явна.
Ай их хүлэг минь:
Дээдсийн тахилгат эх нутаг Дэлгэрхаандаа
Дэлээн ширэлзтэл шижилдсэн, торгон сүрэг дундаа эргэж төрөөрэй.
Дэлхийд цор ганц монгол наадамдаа эргэж ирээрэй.
Наадмын тэнгэр
Адууны минь тэнгэр өршөөх болтугай.