يعني ايه أنيميا
HTML-код
- Опубликовано: 20 сен 2024
- يعني إيه أنيميا
وأعراضها
وإيه اللي بيسببها
طب هل في أنواع للأنيميا ولا هيا نوع واحد
طب إمتى تكون الأنيميا حادة وإمتى تكون غير حادة
الأسئلة دي وغيرها كتير هنجاوب عليها في الحلقة دي إن شاء الله
السلام عليكم ورحمة الله وبركاته
حلقتنا انهارده عن الأنيميا وأول حاجة لازم نعرفها إيه الأنيميا دي ؟
الأنيميا ببساطة هيا نقص الحديد الموجود داخل كرات الدم الحمرا
الأعراض بتاعتها بتختلف على حسب شدة الأنيميا
يعني لو كانت أنيميا خفيفة غالباً مش بيحس المريض بأعراض
إنما لو الأنيميا شديدة يعني نقص الحديد كبير في الحالة دي المريض ممكن يحس بإرهاق أو تعب أو ضيق في التنفس أو صداع أو طنين في الودان وبنلاقي لون الوش شاحب والمريض يحس ببرودة في الإيدين والرجلين وصعوبة في التركيز وصداع ودوخة وأحياناً عدم انتظام ضربات القلب ،
وأحياناً المريض بيحس ان طعم الأكل متغير أو طعم مش حلو ويلاقي نفسه عايز ياكل حاجات غريبة زي التلج مثلاً
وطبعاً تساقط الشعر وتكسير الضوافر
وطبعاً اللي بيأكد ان الأعراض دي أنيميا ولا لأ تحليل صورة الدم
طب أسباب الأنيميا إيه ؟
أول سبب من أسباب الأنيميا دي انك متاخدش كمية الحديد المناسبة لجسمك
طب أنا هاخد كمية الحديد منين حضرتك ؟؟
أجيب شوية حديد وأرأشهم كل يوم ؟؟
لأ يا سيدي متجبش حديد وتأرأشه ولا حاجه ، انت بس هتاكل أغذية غنية بالحديد
زي إيه ؟؟
زي الكبدة واللحمة والسمك والفراخ والتفاح و
إيه ده ؟؟
لو الحديد موجود في الحاجات دي بس ، أكيد معظم الشعب هيكون عنده أنيميا ، الناس مش لاقية تاكل وبيشوفوا الحاجات دي في المواسم بس ، ده لو شافوها كمان ، وتحيا مصر يا عم الحاج .
طب إيه رأيك ان الحديد موجود كتير جداً في البتنجان والسبانخ والبنجر والرمان والجرجير والفجل ونباتات كتير بتكون موجودة في طبق السلطة
طب يا دكتور أنا سمعت ان الشاي بعد الأكل بيسبب أنيميا
بص
في معلومة مهمة جداً لازم نعرفها عن الحديد الموجود في الخضروات والموجود في المصادر الحيوانية
الحديد الموجود في المصادر الحيوانية زي الكبدة واللحمة ممكن تشرب شاي بعد الأكل على طول عادي ، إنما الحديد الموجود في البتنجان والتفاح والسبانخ والمصادر النباتية عموماً لازم تستنى نص ساعة على الأقل بعد الأكل عشان متفقدش القيمة الغذائية للحديد ،
يعني ببساطة أي وجبة نباتية شربت بعدها الشاي على طول فاعرف كده ان جسمك مش هياخد منها حديد .
كمان يفضل انك تحط شوية لمون على السلطة لإن ده بيساعد الجسم على امتصاص الحديد اللي في الأكل .
طب العسل الإسود بيقولوا في حديد
الحقيقة المعلومة دي كانت مظبوطة زمان لكن دلوقتي لأ
وده لإن العسل زمان كان بيتعمل في أواني حديد فكان بيبقى غني بالحديد فعلاً
إنما دلوقتي اللي هياكل عسل إسود هيتخن بس من غير حديد
طب واحد هيقولي يا دكتور أنا باكل كبدة ولحمة وتفاح وبتنجان والكل كليلة ومبحبش الشاي ، ومع ذلك الدكتور لما روحتله وعملت التحليل قاللي اني عندي أنيميا .
هقولك كلامك ده هيخلينا نتكلم عن السبب التاني للأنيميا وهو عدم قدرة الجسم على امتصاص الحديد
وده ممكن يحصل عند بعض المرضى اللي عندهم التهابات مزمنة في القولون أو استأصلوا جزء من المعدة الإصابة ببكتريا المعدة المشهورة باسم البكتريا الحلزونية ، وبعض الأمراض التانية ،
ده كمان في أدوية بتقلل امتصاص الحديد بس مفيش مجال لذكرها دلوقتي
عشان كده قولتلك من شوية تستخدم اللمون في الأكل لإنه بيساعد الجسم على عملية امتصاص الحديد
طب اشمعنا اللمون ؟؟
هقولك يا سيدي لإنه فيه فيتامين سي وده العنصر الأساسي اللي بيساعد الجسم على امتصاص الحديد
طيب
السبب التالت للأنيميا هو فقدان الدم
يعني مثلاً عند الستات بيفقدوا الدم خلال فترة الدورة الشهرية ، طبعاً مش كل الستات بتفقد كميات دم كبيرة ، لكن ده سبب مهم من أسباب فقدان الدم .
كمان لو في قرحة في المعدة أو القولون أو البواسير أو الشرخ الشرجي ، كل الحاجات دي لازم تتعالج عشان تعالج الأنيميا
يعني انت ممكن تتخيل الموضوع ببساطة انك بتحط ميه في كوباية مخرومة لازم تعالج الخرم الأول عشان الكوباية تتملي ،
ده نفس الموضوع عند الإنسان برضو لازم تعالج النزيف عشان تعالج الأنيميا
كمان لو الواحد عمل جراحة بيفقد دم
التبرع بالدم المستمر الغير منتظم وبأكد على غير المنتظم ( يعني فترات متقاربة ) بيسبب الأنيميا
طب علاج الأنيميا إيه ؟؟
العلاج بيكون على حسب السبب
يعني لو نقص حديد في الأكل نزود الأكل اللي فيه حديد أو الدكتور يكتبلنا على دوا فيه حديد لغاية ما نظبط الأكل
نزيف نوقف النزيف
عدم القدرة على امتصاص الحديد نشوف سببه إيه ونعالجه
طب نسبة الهيموجلوبين الطبيعية في الجسم كام وإمتى تكون الأنيميا حادة وإمتى أحتاج لنقل دم وإيه الهيموجلوبين ده أساساً وفي أنواع للأنيميا ولا لأ ؟؟؟
الهيموجلوبين يا جماعة ده عبارة عن بروتين بيكون موجود جوا كرة الدم الحمرا وبيكون مرتبط بيه الحديد
النسبة بتاعته بتختلف على حسب العمر والجنس
يعني النسبة في الأطفال غير البالغين غير حديثي الولادة
ممكن نقول النسبة الطبيعية في الأطفال بتكون 11.5 جرام فما فوق
السيدات 12.00 فما فوق
الرجال 13.00 فما فوق
بالنسبة لحديثي الولادة النسبة بتتغير كل يوم
طبعاً لو النسبة قلت عن الأرقام اللي قولناها دي بيكون المريض عنده أنيميا
طب إمتى المريض يحتاج نقل دم ؟؟
في معظم الحالات المريض بيحتاج نقل دم لو نسبة الأنيميا وصلت لـ 7.0 بس برضو الطبيب المعالج ممكن يكون ليه رأي تاني على حسب الحالة الصحية للمريض ، يعني ممكن مريض توصل الأنيميا بتاعته لـ 7.0 والطبيب يكتفي بحقن حديد أو حتى أقراص بس .
طب هو فيه أنواع من الأنيميا دي ؟؟؟
الحقيقة هي مش أنواع هيا أسباب بس بيتقال عليها أنواع ، يعني مثلاً
أنيميا البحر الأبيض المتوسط
أنيميا نقص فيتامين ب 12
أنيميا نقص حمض الفوليك
أنيميا نقص الحديد وده أشهر نوع واللي معظم كلامنا كان عليه
أنيميا الخلايا المنجلية
أنيميا التحلل الدموي اللي احنا بنقول عليها أنيميا الفول
موضوع جميل
معظم الناس بتعاني من الانميا
ربنا يبارك فيك
ماشاء الله بالتوفيق يا دكتور
ربنا يوفقك
بالتوفيق دايما
شكراً يا فندم
ماشاء الله بالتوفيق دايما يارب ♥
❤
🥰