أحمد الناصر وناصر الشيباني في حفل الجامعة.flv

محاورة بين أحمد الناصر الشايع و ناصر بن سرحان الشيباني حفل جامعة الملك سعود في الرياض.
1398 هـ
أحمد:
سلام الله على ابن سعود والأصحاب والأجناب
سلامٍ من تسمَّع فيه يلعب به ويرغب به
تهرَّج يابن مَشْيَبْ والحضور تعلِّم الغِيَّاب
ومن يِقْدِم ويحضر حفلنا لازم نرحب به
ناصر:
سلمت من العنا ياللي تسلِّم والعيون حْرَاب
ترى الملعب وسيع ومن حضر باللعب يلعب به
عسى ربي يعز سيوفنا والنَّادر القصَّاب
تثـبَّت ياأحمدالناصر ترى النيران مشتبّه
أحمد:
نبى نلعب معك ساعه ونفتح للسوالف باب
وباب السالفه مضمون بالمزلاج فالضَّـبَّه
أنا أدوِّر رفيقٍ عن عيوني ياجماعه غاب
أبوكرعان عوج وفرع راسه تقل مِرْزَبَّه
ناصر:
أنا من فضل رب البيت لا طالب ولا طَلاَّب
ترى رزق الاْبِنَ لآدم ياوسيع العرف من ربّه
ألا ياليت بعض الناس ما يلبس جديد ثياب
ليا منّه سرى كنّه مع الريضان سِحْلبّه
أحمد:
نبى نمشي بَحَر يا الله لا تتكل على الأسباب
أحَد يسبح وأحَد يصبح فطور الحوت بالغِبّه
أقول أنت الغريم أنت الخصيم وجابك الجلاَّب
وأبوقرشين لو يبغى يسافر ويش يركب به
ناصر:
أنا خابرك غالب ياأحمدالناصر مع الأعراب
وألا ياطير ياطير الفَلَس دايم على الشَّـبَّه
أنا والله ما لي قلب يوم ألعب مع الكذَّاب
وجع بطني لِيَا منَّه عَصَبْنِي فيه وش طِبّه
أحمد:
تهوز بسيف عنتر مار أنا أهوزك برمح ذياب
ورمح ذياب كلٍ خابره ما ينتكذَّب به
ترى اللي ما يحسِّب لليال المقبلات حْسَاب
تِشَرِّق به هواجيسه ولا تقدر تِغَرِّب به
ناصر:
أنا ودّي بذبح القوم وإلا انته من الأصحاب
حزامك ياأحمدالناصر تحزَّم به تحزَّم به
ألا ياطير ما انتب طير مِحْرٍ إنك جناح غراب
ترى ليل المغنِّي من ورا دايم مع الـحَـبّه
أحمد:
أنا بنصحك لله لا تقوم وتشرف المرقاب
أخاف إنه يجيك مْعَ العَتِيْم مْشَرَّخ الـجُـبّه
أبَصِدِّك وأبَرِدِّك وعقب أكتب عليك كتاب
قليل المعرفه ظن المزار مزخرف القـبّه
ناصر:
ليا منّك عصيت العلم عُوُد وفي يدي مشعاب
حلال القوم صخَّن دَيْتِرِه وانْشَقَّت الطَّـبّه
أنا بنصحك لا تقطع جَلَبْك إلاَّ على الشيَّاب
تثبَّت لا تغرّك لعبتي بالشمس بالـحَـبّه
أحمد:
تبا تنصب عليَّه مستحي لا أقول يانصَّاب
تبى بشتٍ جديد وثوب شَدّ الشام تنصب به
ألا ياعنـز ياأم قْرَيْنْ ياللي مِنْوِةْ الْحَلاَّب
قليل العرف ما اشمت به ولا أحبّه ولا أسبّه
ناصر:
أنا خابرك تمرة خِرْجْ ما تَحْرُبْ مع الْحَرَّاب
قليل ريال وإلا ياجماعه قرقع الدَّبَّه
أنا مانيب عنـزٍ لك تراني مثل فرخ الداب
تحمَّد ربك المحمود وإكْلَ العشب يالضَّـبَّه