17e Dimanch B - Ni Sa Ou Ye, Ni Sa W Genyen Konte

Sen Augustin te di : « Bondye te kreye nou san nou, men Li pap sove nou san nou. » Pou Bondye aji pou moun, fòk moun pote kontribisyon pa yo, fòk nou pote kichòy ; fòk nou sispann pale anlè tankou Filip ak Andre, fòk nou aprann konkrè ; paske yon lide ap rete yon lide sil pa pase nan reyalite ; yon rèv ap ret yon rèv si l ret nan kabann. Se lè nou bay Bondye bay ; e pou nou resevwa, fòk nou antre nan lojik bay la. Ede tèt nou, e Syèl la va ede nou. Men, tankou Jezi te di l : « moun pa viv ap pen sèlman.» Gen moun, se pa pen yap tann nan men nou, men se moso renmen, zanmitay, yon ti moman ansanm, moso kè poze, yon jès solidarite nan moman eprèv yo, tèt ansanm. Kifè, pou nou amelyore pwoblèm mond la, peyi nou ak sosyete nou yo, pwoblèm fanmiy yo, pwoblèm nan relasyon yo, nou bezwen bay jenerezman sa nou genyen ak sa nou ye : lajan, tan nou ak talan nou. Yon kretyen pa ka gen lapè alòske lòt la nan pwoblèm. Sa se yon pwoblèm moral, se yon èskandal. Men dèfwa, tankou Andre ak Filip, nap chèche eskiz, nap rale kò nou, nou menm vle sèvi baryè pou lòt yo pa benefisye anyen; epoutan se nou menm Bondye vle sèvi avèl pou rive bay lòt yo satisfaksyon. Li bezwen nou, menm si nou ta panse nou paka fè gran choz, menm jan ak Apot ki tap mete baryè, epoutan ki te pral ede separe pen bay tout moun ; se pou sa Lap rele nou. Ou menm, si w tande vwa L, pa fèmen kè ou !