Urdu poetry - Independence Day - ghazal - 'daldal' - یَومِ آزادی ۔ غَزَل ۔ دَلدَل

Independence Day ghazal
‘Daldal’
Chal kay seedhay, sanbhal naheen saktay
Ultay qadmon bhi cal naheen saktay
Aisi daldal main aa phansay hain ham
Mar kay bhi ab nikal naheen saktay!
Hukm pe aasman kay chaltay ho?
Phir to haalat badal naheen saktay!
Gham hain utray ba-soorat-e-lashkar
Aa gayay hain to tal naheen saktay!
Larrkharratay charaagh hain ghar main
Bujh to saktay hain, jal naheen saktay!
Girrgirrana falak kay aagay kya?
Aisay pathar pighal naheen saktay!
Kon marta naheen hai jannat per?
Rind hain jo phisal naheen saktay!
Jaantay sab hain kaun fitna hai!
Raaz-e-dil per ugal naheen saktay!
woh jo tum ko nazar naheen aatay
harf-e-daanish nigal naheen saktay!
Aisi fikr-o-nazar pe bandish hai
Khuwab main bhi machal naheen saktay!
Qaum ki sochtay bhalaayi ho?
Tum siyasat main chal naheen saktay!
Daikhtay hain bahaar pat-jharr main
Khuwab apnay kuchal naheen saktay!
Kuch kataayib ka haath hai warna
Khoon kay dariya ubal naheen saktay!
Jabr kuch aur ho fuzoon hakim!
Yun to muflis behal naheen saktay!
woh jo gulshan ko raund jaatay hain
khushbuon ko masal naheen saktay!
Aisay noha-gari main uljhay hain
Ab to keh bhi gazal naheen saktay!
Kya zehr hai tumhaari baaton main!
Sher geeton main dhal naheen saktay!
chhin gaya hai qalam Aqeel apna
goyaa aansoo nikal naheen saktay!
sikander aqeel Ansari
#independenceday #freedomofspeec