الأهرامات والطاقة الحضارة المفقودة للباحث أحمد عدلي

ما نعلمه عن الحضارة المصرية القديمة ضئيل ضئالة النجوم في السما، ورغم وجود أبحاث ودراسات علمية كتير عنها إلا إن معظمها بالإنجليزية أو لغات أخرى ولم تترجم للعربية،
عارفين إن الحضارة المصرية عظيمة لكن عظمة عن عظمة تفرق وإحنا مانعرفش قدر العظمة دي لأنها تكمن في التفاصيل اللي محتاجة شرح بطريقة يفهمها المواطن العادي،
عدد الأقسام اللي بتدرس علم المصريات في العالم كتير جداً ومعظمها بره مصر وعدد علماء المصريات الأجانب أكتر بكتير من المصريين،
وطبعاً بيواجهوا في دراساتهم نفس البيروقراطية والصعوبة في الحصول على التصاريح والتراخيص والزيارات ولما بيوصلوا لإنجاز حقيقي كبير الدولة المصرية مش بتعترف بيه بسهولة،
ورغم وجود الأوراق والكتب البحثية الكتير دي إلا أن الروايات الرسمية عن حضارة المصريين هي روايات مشكوك في صحتها وروايات جامدة مش بتتغير إلا بعد سنين كتير محاولات علماء المصريات،
الموضوع معقد والأبحاث كتير وبعضها متضارب وده كتير على واحد زيي وزيك إنه يقدر يترجم ويجمع القدر ده من المعلومات ويقارن بينها عشان يطلع بنتيجة وإحنا عايزين الخلاصة،
من حسن الحظ فيه شاب هايل جداً إسمه "أحمد عدلي" عامل سلسلة على اليوتيوب إسمها (الحضارة المفقودة) وعلى الفيس بوك إسمها قبل التاريخ
سلسلة من الحلقات الشيقة جداً اللي بتتكلم عن الحضارة المصرية القديمة من منظور مختلف تماماً عن اللي متعودين عليه،
بعد كام حلقة هتكتشف إن أحمد مش دارس آثار ولا تاريخ، ده خريج هندسة عين شمس وباحث هاوي للحضارة المصرية وبالتالي هو بيحقق في أسرار المصريين القدماء وفقاً لدراساته الفيزيائية والكيميائية وبالتعاون مع چيولوچيين وعلماء أحياء وعلماء فلك مستقلين لأ وكمان بيتواصل مع علماء أجانب عشان يعمل حلقة، تحقيقاتهم ذكية جداً وعاملة زي الأفلام الأجنبي كده ومعتمدة على حقائق ووقائع وأرقام دقيقة،
المعلومات اللي أحمد بيحاول يقولها مش مجرد معلومات جديدة عن مصر القديمة، دي معلومات بتغير في ثوابت كتير جدا بقالنا سنين معتقدينها،
أهمها إن تاريخ مصر مش من 3500 سنة بالعكس ده أبعد من كده بكتير، الموضوع مش مجرد دراسة شوية حجارة والحضارة مش تخصص الآثاريين بس، ومش حكر عليهم وواجب مشاركة العلوم التانية وبصلاحيات أكبر،
وكمان الحضارة المصرية مش مجرد موت ودفن وأثار وآلهه، إنت هتتشكك في إجابات أسئلة كتير مهمة:
هل الأهرامات فعلا كانت مقابر؟
هل كانت توجد حياة أكثر تطوراً مما نحن عليه الآن؟
طب ملامح الحياة دي راحت فين؟
كتير من الآثاريين المصريين مش بيحبوا أحمد عدلي لإنه بيلعب في ثوابت كتير هم عايشين عليها وفيه ناس كتير لا تجرؤ على مناقشتها لأنها صادمة،
أراؤه محايدة جدا ومش بيوجهك هو بيقولك معلومات ويسيبك تفكر بطريقتك وحتى لما بيقول وجهة نظره بيوضح ان دي وجهة نظره الشخصية،
الحلقات شيقة ومثيرة ومناسبة للمشاهدة العائلية حتى لو إنت مش مهتم بالحضارة والحجارة والأهرامات، هتتفرج وكأنك بتتفرج على فيلم أو حدوتة حلوة،
تحت رعاية منوعات عالميه