【專隊系列👨🏻‍🚒👩🏻‍🚒高空拯救專隊】

呢隊人唔怕高，喺懸崖峭壁⛰️、大廈外牆🏢、地盤天秤🏗️、大橋橋墩🌉都有可能見到佢哋，佢哋就係高空拯救專隊！
專隊主要負責執行高空環境嘅救援任務，例如有人被困喺纜車🚡、高樓大廈嘅吊船、貨櫃碼頭起重機等事故。專隊成員都係經過進階訓練，熟悉運用繩索🪢同埋專門裝備進行救援。近年常見嘅攀山拯救事故，如果地點涉及懸崖峭壁，或者地勢險要，高空拯救專隊都會到場協助。
為咗確保隊員嘅專業水平，專隊會定期到香港各處有風險嘅地方進行實地救援訓練，亦會同各政府部門緊密合作，時刻準備提供支援。