Брайль бичигт сургах арга зүй

“Тусгай хэрэгцээт боловсрол шаардлагатай хүүхдэд үзүүлэх эрүүл мэнд, боловсрол, нийгмийн хамгааллын үйлчилгээг сайжруулах төсөл (START2)”-ийн II шатны хүрээнд, хараа, сонсгол, оюун ухаан, тулгуур эрхтний бэрхшээлтэй хүүхэдтэй ажиллах, сургуулийн өмнөх болон сургуулийн насны хүүхдэд чиглэсэн явуулын сургалт зохион байгуулах, туслах багш ажиллуулах зэрэг 9 бичил төсөл хэрэгжлээ.
Ковидын халдвар тархалтын нөхцөлд боловсролын байгууллагууд хөл хорио тогтоон теле болон цахим хичээл зохион байгуулж ирсэн боловч, сургалтын үйл ажиллагаанд зарим сөрөг нөлөө гарах болжээ. Үүнд, хөгжлийн бэрхшээлтэй хүүхдүүд онцлог хэрэгцээндээ нийцсэн боловсролын үйлчилгээнд хамрагдах, сурч боловсрох эрхээ эдлэхэд тодорхой хүндрэл учрах, суралцахуйд нь ноцтой хоцрогдол үүссэн зэргийг дурдаж болно.
Тиймээс, тус төсөл 2021-2022 оны хичээлийн жилд Боловсрол, шинжлэх ухааны яамны саналыг үндэслэн хөгжлийн бэрхшээлтэй хүүхдийн суралцахуйд дэмжлэг үзүүлэх, сурлагын хоцрогдлыг арилгахад чиглэсэн бичил төслүүдийг хэрэгжүүлсэн бөгөөд эдгээр бичил төслийн үр дүнд бий болсон эцсийн бүтээгдэхүүнүүдийг та бүхэнд танилцуулж байна. Ковидын халдвар тархалт буурсантай холбогдон танхимын хичээл, сургалт дахин сэргэсэн хэдий ч, тусгай хэрэгцээтэй хүүхдүүдийн гэр бүл, эцэг эх, асран хамгаалагчид, тэдэнтэй ажилладаг багш нар дараах хэрэглэгдэхүүн, гарын авлага, видео материалыг хичээл, сургалтын үйл ажиллагаандаа нэмэлт байдлаар ашиглах боломжтой боллоо.
1.Харааны бэрхшээлтэй хүүхдэд зориулсан багц хэрэглэгдэхүүн
Уг багц хэрэглэгдэхүүнийг харааны бэрхшээлтэй хүүхэдтэй гэр бүл, эцэг эх, асран хамгаалагчид болон тэдэнтэй ажилладаг багш нарт зориулан боловсруулсан бөгөөд шаардлагатай бүх хэрэглэгдэхүүнийг бүрдүүлсэн цогц гарын авлага юм. Зорилтот хүүхдийг сурч боловсроход нэн тэргүүнд эзэмшвэл зохих чадварт тооцогддог тэмтрэх мэдрэхүй, хэл яриаг хөгжүүлэх, брайль бичгээр уншиж бичих, орон зайд баримжаалах, цагаан таяг ашиглах арга зэрэг агуулгыг гарын авлагад тусгаж, тайлбар дүрс бичлэгийг багтаасан.