الشاعر عبدالعزيز بن حمد البادي و الشاعر خلف بن هذال ،،، ولاتنسى العقيد اللي قدحنا الزند بحضارهـ

٢٠ # محاورة { ولا تنسى العقيد اللي قدحنا الزند بحضارهـ } بين الشاعرين { عبدالعزيز بن حمد البادي *** خلف بن هذال العتيبي } ،، الطاروق الاول من محاورة ساجر ١٣٩٩هـ
تويتر / ABDULAZIZ_ALBAD@
تك توك / abdulaziz_albadi@
رقم القناة / 0556094465
الأبيات:
خلف بن هذال
1 : هلا يا مرحبا باللِّي ثلاث شهور ما شفناهـ
يذكَّر فالقصيم وكل ليلٍ مولعٍ نارهـ
2 : وله سمعه وله لمعه وله بيتٍ على معناهـ
وهو عبدالعزيز البادي اللِّي تاصل اخبارهـ
عبدالعزيز البادي
3 : عسى يحييك من ينشا السحاب اللّي ينثّر ماهـ
انا مثلك حدان الشوق أبي للقلب تذكارهـ
4 : إلى شفتك يطيب الكيف والمعنى على مجراهـ
أحد يمسك يمين الدرب واحدٍ صاع ليسارهـ
خلف هذال
5 : أنا خابرك حَيْدٍ ثابت ما يختلف مَرْسَاهـ
ولكنَّ الليالي جاتِ خدَّاعهْ وغدَّارهـ
6 : سمانا كل عام فيه نجم امْشوبهٍ مسراهـ
والا يا ليتني كبتن واطير بكل طيارهـ
عبدالعزيز البادي
7 : انا حيد على مرساهـ ما ترعى حدود احماهـ
ولاني من صميله في لهيب القيظ مطَّارهـ
8 : سمعنا من تلفت للنجوم السامرهـ يلقاهـ
وبعض الناس ما له في طويل الدَّرب وش كارهـ
خلف هذال
9 : ما به حدّك ولا عدّك وسدّك ما بحثت اقصاهـ
ما افتش في جنازة عندها تسعين قبَّارهـ
10 : ترى الليله نباها مثل ضرب السيف فالمثناهـ
ما هي ضرب العصيَّ البالية يا موجه الغارهـ
عبدالعزيز البادي
11 : انا اساريك واجاريك والمكتوم اشيل اغطاهـ
ترى صم الصخر ينصب لها بالضلع كسّارهـ
12 : تتبع للجنازة والجنايز فاللحود اخْباهـ
وكل عند حزَّات الطلب ينخى على ثارهـ
خلف هذال
13 : توقع لا تسرع مِزْهَبَ العربان لا تنساهـ
معك قصة طويلة فلتين وحوش واعمارهـ
14 : بعد وجْعَتْ عِيونه ذرَّها واتلى السبب بِدْواهـ
والا يالله لا تعمي عيونٍ تشهد الحارهـ
عبدالعزيز البادي
15 : وانا ذا الحين اقول اذكر جفال الذود من مفلاهـ
ولا تنسى العقيد اللي قدحنا الزند باحظارهـ
16 : بعد طابت ليالك والزمان أطْبق دقيق ارحاهـ
ولك شفرهـ وزفرهـ في يدك صِفْرهـ وزمَّارهـ
خلف بن هذال
17 : يفكّونه ويرعونه مع المضْمى يا بو جمهاهـ
ولي شفرهـ ومسمومة تدق الخصم في زَارِهـ
18 : تريّح عند مجدولٍ يمرِّخ فالقدح حنّاهـ
وطيبكم حرامي ويا كود ايْعاهِدْهِـ جارهـ
عبدالعزيز البادي
19 : يا كم واحد رمينا بندقه فالقاع من يمناهـ
وهو من قبل ما يخطي يقرّرها على الشارهـ
20 : وقفنا بالدفينه والخبارهـ مير لا تناساهـ
ولا ني قايل لك علم به هنّه ونقّارهـ
خلف بن هذال
21 : صدقت ولا كذبت وكل شخص امخيّرٍ بارياهـ
تحذفون البنادق في حضن كلبه وجمَّارهـ
22 : ألا يا دَلْوِ جاذب يا ذباذب طارت المنحاهـ
تعرّضت الدفينه وانت لا فرمل ولا طارهـ
عبدالعزيز البادي
23 : انا افادمكِ والازمكِ واقف لك على المندَاهـ
وإلين إنّا نكرفت حمض ليمونك بِعصَّارهـ
24 : علامك صرت مثل اللّي يبوِّهـ ما عِرف مجراهـ
يبوش ولا يشوش الا الى حطِّيت زنقارهـ
خلف العتيبي
25 : تلازمني وتخدمني وسرِّك عارف مبداهـ
وانا دابك ليا ضيّعت وانت اليوم محَّارهـ
26 : ترى من يامن السرحان فالمفلى يخاوى الشاهـ
بعد يومين والثالث يشوف النقص باجفارهـ

[@Ahmad-c9k9j]

رحمة الله على البادي والله يشفي شاعر الوطن خلف

[@ADBULAZIZ_ALBADI]

اللهم آمين