لوط عليه السلام

حضرتك تقولى انت تقصد ان الأفلام اللى بتشجع على الموضوع ده.. الهدف منها اننا نتعود فنقوم نتقبله مع مرور الوقت؟.. أقولك والله لو ده اللى انت فهمته فانت حر.. أنا عموما مقولتش كده.. وخلينا بقى فى قصة سيدنا لوط لو سمحت..
سيدنا لوط سأل أهل مدينة سدوم.. أَتَأْتُونَ الْفَاحِشَةَ مَا سَبَقَكُمْ بِهَا مِنْ أَحَدٍ مِّن الْعَالَمِينَ؟.. انتوا بتعملوا ايه؟.. انتوا اخترعتوا فاحشة وذنب ومعصية محدش قبلكم كان يعرفها ولا عملها؟.. خلصتوا كل الإبداع الفنى اللى فى الدنيا ومعدش غير دى؟.. أقصد خلصتوا كل الذنوب والفواحش وبقيتوا تخترعوا فواحش جديدة؟..
إِنَّكُمْ لَتَأْتُونَ الرِّجَالَ شَهْوَةً مِّن دُونِ النِّسَآءِ بَلْ أَنتُمْ قَوْمٌ مُّسْرِفُونَ.. والإسراف ده اللى هو الخروج عن الحق للفساد.. ده مين اللى بيقول يا فندم ياللى سامعنى ومضايق منى.. سيدنا لوط.. الكلام ده مذكور فى القرآن الكريم.. يعنى الموضوع مفيهوش تجويد ولا فتى..
يقوم يرد عليه قومه يقولوله ايه بقى؟.. حد من حضراتكم يقولى أنا عارف قالوله ايه.. قالوا ان دى حرية شخصية وان حسابهم بينهم وبين ربهم وانت ملكش فيه.. أقولك لأ اللى قال كده زوجة سيدنا لوط.. وهقولك ربنا عمل فيها ايه كمان شوية لمجرد انها قالت كده.. رغم انها مكنتش بتمارس النوع ده من الفواحش.. لكن لمجرد انها دافعت عنه وشجعته.. كان حسابها عظيم.. وهقولك ايه اللى حصلها كمان شوية.. لكن خلينا دلوقتى فى رد الناس على سيدنا لوط..
قالوا أَخْرِجُوهُم مِّن قَرْيَتِكُمْ إِنَّهُمْ أُنَاسٌ يَتَطَهَّرُونَ.. حضرتك فاهم الآيه الكريمة بتقول ايه؟.. قوم لوط كانوا شايفين ان سيدنا لوط انسان طاهر.. وعلشان كده مكنش عاجبهم.. كانوا شايفين ان الطهارة هى اللى غلط وان الفواحش ما هى إلا حرية رأى وتعبير.. أنا هشجع على الفواحش يا أخى انت مالك.. أنا إنسان لعين يا أخى.. أنا حر.. أقولك لأ مش حر.. لأن تشجيعك ده هيأثر على اللى حوليك.. واللى حوليك دول ممكن يكونوا ولادنا.. وبالتالى انت أذيتهم.. مش بس كده.. ده أنا لما أتجاهلك وأسيبك تعمل اللى بتعمله ده.. أبقى شاركتك فى أذية ولادى أنا بشكل غير مباشر.. لأنى شوفت الغلط ومشاورتش عليه وقولت انه غلط.. فالجيل الجديد اللى هما ولادنا لما ملقيوش حد يقول على الغلط غلط.. فهموا انه صح.. وعادى انه يحصل.. فوقعوا فيه.. وإلا ربنا مكنش اهتم بالموضوع كله لدرجة انه ينزل ملائكة من السما علشان يعاقبوا اللى بيعملوا كده..
#المواطن_سعيد #حرية_الإبداع #سيدنا_لوط