Х.БАЯРМАА: ИХ ЗАН СУУХ, БИЕЭ ТООХ Л ЖИНХЭНЭ ЖҮЖИГЧИН ХҮНИЙГ ЗОГСООДОГ ЗҮЙЛ

“Тэр” буландаа жүжигчин Хүсэлбаатарын Баярмааг урьж ярилцлаа. Монгол Улсын Гавьяат жүжигчин Ё.Цогын ач охин, жүжигчин, найруулагч Ц.Хүсэлбаатар, хошин урлагийн анхдагчдын нэг Гавьяат жүжигчин С.Өлзийхүүгийн охин тэрээр урлагт хөл тавихад гэр бүлийнхэн нь хэрхэн хүлээж авсан болоод хүүхэд нас, хүсэл мөрөөдлийнхөө талаар шинэхэн кионных нь зураг авалтынхаа талбай дээр ярилцлаа.
-Жүжигчний мэргэжлээ дангаар нь биш хос болгон АНУ-д төгсөөд ирсэн талаараа яриагаа эхлүүлье.
-Би жүжигчин, зохиолч, продюсер мэргэжилтэй. СУИС-д тайзны урлаг болон кино урлагийн мэргэжлээр 4 жил суралцан 2012 онд төгссөнөөсөө хойш жүжигчнийхээ мэргэжлээр ажиллаж байна.
Дундуур нь 2016 онд АНУ-ын Миссури мужийн Missouri State University-д кино зохиолч, продюсер, найруулагч мэргэжлээр суралцаад магистрын дипломоо аваад монголдоо ирсэн. Одоо мэргэжлээрээ зохиолоо давхар бичээд ажиллаж байгаа.
-Жүжигчин мэргэжлийг сонгоход аав, ээжийн нөлөөлөл их байсан болов уу?
Мэдээж жүжигчний мэргэжлийг дурлаж өөрөө дурлаж байж сонгосон. Бүүр жаахан байхаасаа ээжтэйгээ цуг драмын театрт ажиллаж байх үед нь дагаад гүйдэг байсан. Драмын театрын мундаг ахмад уран бүтээлчдийн тоглолтыг хараад багаасаа драмын урлагт, жүжиглэх кино урлагт дурласан гэж хэлж болно.
Намайг жүжигчний мэргэжлийг сонгоход манай гэр бүлийнхэн дуртай байгаагүй. Их эсэргүүцэж байсан. Ялангуяа ээж маань энэ тал дээр жаахан дургүйцэж хүлээж авч байсан.