أحذر من وصولات الأمانة
HTML-код
- Опубликовано: 14 окт 2024
- في مصر احنا بنستخدم وصولات الأمانة كتير جداً علشان الناس تضمن حقوقها من بعض، ممكن يستخدمها واحد عايز يشغل فلوسه مع واحد تاني في تجارة علشان يضمن الفلوس اللي حيدهالو، أو واحد سلف تاني فلوس وعايز يضمن انه يرجعها فيخليه يكتب على نفسه وصولات أمانة، وساعات بيستخدمها أهل العروسة كبديل عن القائمة أو مقابل للمؤخر، وساعات تانية بنستخدمها كوسيلة لضمان سداد الأقساط لما واحد يشتري سلعة معمرة أو أجهزة كهربائية بنظام القسط،
معاكم: عمرو العروسي والنهاردة حنتكلم عن وصولات الأمانة.
بادئ ذي بدء لازم نعرف أن وصولات الأمانة وظيفتها الأساسية مش الحفاظ على الحقوق، ولا هي اتعملت كوسيلة للسيطرة على الناس وانك تمسك حد من ايده اللي بتوجعه، وصولات الأمانة وظيفتها في الأساس أنها تضمن توصيل الأمانة من الشخص ألف إلى الشخص ب من خلال الشخص ج. (بس كده ومش حاجة تانيه) يعني وصل الأمانة بيعتبر وثيقة قانونية ثلاثية الأطراف بتفترض أن الشخص ألف عايز يوصل حاجة للشخص ب فبيدي الحاجة للشخص ج على سبيل الأمانة علشان يوصلها للشخص باء.
لكن ولأن عقوبة جريمة خيانة الأمانة كبيرة في القانون المصري ومفيش فكاك منها ابتدت الناس تستخدم الوسيلة ديه علشان تحافظ على حقوقها من بعض... زي ما قلنا في أول الفيديو، يعني من الآخر بيتم استخدام وصولات الأمانة كوسيلة ضغط للوفاء بالديون.
تعالوا بقى نشوف شكل وصل الأمانة، ونعرف ايه اللي المفروض ان انت تاخد بالك منه لو انت بتكتب واحد وصل أمانة، وبردو حنعرف لو أنت اللي بتكتب وصل الأمانة على نفسك ازاي انك تقدر تدافع عن نفسك بمفهوم العكس.
اللي احنا شايفينه قدامنا ده هو نموذج لوصل الأمانة، أول حاجة بنلاقيها هنا خانة أستلمت أنا: فلان وفي هذه الخانة بنكتب أسم الشخص المدين اللي انت عايز منه فلوس اللي هو المفروض في القانون انه الشخص (ج) اللي حيوصل الفلوس للشخص (ب)، وهنا لازم تكتب اسم الشخص ده كامل من واقع البطاقة علشان مايبقاش في أي لبس، وجنب أسم المستلم حتلاقي بطاقة شخصية رقم .... وهنا بتحط الـ 14 رقم الخاصين بالبطاقة الخاصة بالشخص المدين من واقع البطاقة بردو، في ناس بتشيل الأرقام الخاصة بتاريخ الميلاد، مافيش داعي يا جماعة مش حتخصر حاجة لما تحط الـ 14 رقم كاملين منعاً لأي التباس، ولوسمحت ماتحطش تاريخ اصدار البطاقة عارفين ليه، لأن دعوى خيانة الأمانة زيها زي بقية الدعاوى بيسري عليها نظام التقادم، يعني ماينفعش تطالب بيها بعد مرور عدد معين من السنين، وفي حالة وصل الأمانة ماينفعش تطالب به بعد 3 سنين من تاريخ تحريره، أه طبعاً ممكن تقول ان تاريخ التحرير كان حديث وان الشخص كان معاه بطاقة قديمة. لكن لما تتجاهل تاريخ الإصدار انت بتنأى عن نفسك بده كله.
، بعد كده بنلاقي البيان الخاص بالعنوان تحت مسمى المقيم في: وده بردو المفروض يتملى بعنوان الشخص المدين من واقع البطاقة الشخصية، نيجي بقى لخانة المبلغ، والمبلغ هنا بيتكتب مرتين مرة بالأرقام ومرة بالتفقيط، لأن طبعاً الأرقام يمكن التلاعب فيها. لو حد حيزود صفر الأمور حتختلف خالص، علشان كده لازم يتم تفقيط المبلغ أي أن يتم كتابته بالحروف منعاً لأي تلاعب، وطبعاً لازم المبلغ ده يكون منطقي يعني حضرتك ماتكنش تاجر وحجم تجارتك مثلاً 40 الف جنيه ومكتب واحد وصل أمانة بمليون جنيه (طب جبتهم منين)، ومن منطقية الأمور كمان أن انت لما حتدي أمانة لحد عشان يوصلها لحد تاني ده حيكون مبلغ في حدود 10، 20، خمسين الف جنيه لكن لو كان المبلغ ضخم فالقاضي حيسأل نفسه ليه الدائن اللي هو (أ) ماوصلش المبلغ بنفسه للشخص (ب) خاصة مع ضخامة المبلغ.
في الأخر بقى بنلاقي خانة المستلم، بيكتب فيها اسمه رباعي من واقع البطاقة الشخصية، وهنا لازم نراعي أن الشخص المدين يمضي قدام عنينا، لأنك لو بعتله إيصال الأمانة مع حد عشان يمضي عليه ممكن يخلي أي حد يمضي عليه أو يمضي بايده الشمال ويطعن من بعدها بالتزوير ويضيع حقك، وفي خانة التوقيع المفروض يحط الفورمة بتاعته لو عنده فورمة، وهنا بعض الناس بتوصي انه زيادة توكيد ممكن المدين يبصم جمب اسمه، طبعاً في احتمال كبير انه يرفض ويقولك انا مش بصمجي أنا بقرا واكتب، مافيش مشكلة ... لكن دايماً أحسن لو بصم لأن البصمة لن يستطيع الطعن علياه بالتزوير بأي حال.
في الآخر أحب أضيف بعض النصائح علشان تضمن انك بتحرر وصل أمانة سليم ومافيهوش أي مشكلة:
1- لازم وصل الأمانة يتكتب بقلم واحد وماتغيرش القلم اللي انت بتكتب به، لأن ده ممكن يكون قرينة أن جزء من وصل الأمانة اتكتب في وقت وجزء تاني اتكتب في وقت لاحق وده مش صح قانوناً.
2- من المستحسن أن المدين نفسه هو اللي يكتب وصل الأمانة كله بخط ايده، علشان مايقولش ان الدائن زود المبلغ ده أو الرقم ده.
3- ماتسبش أي خانات فاضية في وصل الأمانة لأن قانوناً المفروض الوصل كله يتملا مرة واحدة، لذلك بتكون مسألة انك تمضي حد على بياض وتملا وصل الأمانة بعد كده مدعاة للطعن عليها.
4- يستحسن الاحتفاظ بصورة من بطاقة المدين علشان تقدر تحرر محضر ضده بجريمة خيانة الأمانة، لأن اللوائح قد تتطلب صورة بطاقة المشكو في حقه في بعض الجرائم ومنها خيانة الأمانة.
وصولات الامانه
لو عجبك الفيديو لوسمحت اعمل لايك، وشير الفيديو مع أي حد انت شايف انه ممكن يستفيد منه، وشاركني برأيك عن أي نصايح ممكن يكون من شأنها تحسين المستوى أو طرح مواضيع قانونية أخرى ممكن انها تهمك... سلام واشوفكم على كل خ
جزاكم الله خيرا وجعله فى ميزان حسناتك
شرح وافى وجميل
الف شكر يا ابو حميد…
كل الشكر والتقدير للمجهود الرائع والتوضيح
أفادك الله
الف شكر لحضرتك للمتابعة 🙏🏽🙏🏽
جزاكم الله خيرا
امين يا رب ،،، واشكرك على المتابعه
شرح جميل جدا ولخص اساله كتير جدا - بسي في سؤال منا ممكن محطش تاريخ الاصدار بسي وانا بمضي (اكتب التاريخ مع الفرمه + لو بصمت برده) وعدي 3 سنين اقول سقط بالتقادم واحولها لخبير لمعرفه عمر البصمه واقعد اشكك فيه
Ahmed aly ممكن طبعا... ودايما بيكون وضع التاريخ في مصلحة المدين اللي كاتب على نفسه الوصل... لانه ممكن يتمسك بالتقادم.... لكن هو ليس في صالح الدائن في شئ
كلامك صح جدا
Esraa Badawy الف شكر 🙏🏽
الله ينور عليك انا سمعتك فديوهات كتير وأول فديو افهم منه كويس جداً الله ينور على حضرتك
الف شكر يا اسلام ربنا يخليك،،،، 🥰
فيديو رائع... لو سمحت في طريقة تانية تضمن حق الاقساط الشهرية لبيع منتج غير وصل الامانة ... شكرا لحضرتك
الف شكر على المتابعة... ممكن ضمان الاقساط الشهرية عن طريق شيكات مؤرخه... لكن صراحة تظل وصولات الامانة هي الطريقة الاقوى 👌🏼
الف شكر على المتابعة... ممكن ضمان الاقساط الشهرية عن طريق شيكات مؤرخه... لكن صراحة تظل وصولات الامانة هي الطريقة الاقوى 👌🏼
الف شكر على المتابعة... ممكن ضمان الاقساط الشهرية عن طريق شيكات مؤرخه... لكن صراحة تظل وصولات الامانة هي الطريقة الاقوى 👌🏼
ينفع ازود كلام في صيغه وصل الامانه ولا يبوظ ... يعني كنت عايز اكتب كده .. ( وفي حاله عدم تسليم المبلغ اكون مبددا وخائنا للامانه واتحمل كافه المسؤليه الجنائيه والمدنيه كما اقر بانني وقعت علي الايصال بكامل ارادتي دون اكراه كما اقر ان الايصال ليس ضمانا لاي حق مدني او تجاري ) ... هل ينفع ولا كده الصيغه والوصل باظ ؟! .. وشكرا جدا واستفدنا من حضرتك كتير
اهلاً عمرو ... لا يوجد ما يمنع يا عمور
@@aaroussy الف شكر .. تسلم
الصوت منخفض جدا
اسف … إن شاء الله 🤲🏼 تلاقي الصوت محسن في الفيديوهات القادمه
أحسنت
الف شكر 😍🙏🏽
اختى كتبت لى وصل امانه ومفيهوش المبلغ بالارقام فيه بالحروف فقط هل ده يلغى الوصل
العبرة بالكتابة بالحروف
طب من فضلك انا رافعه وصل امانه بس لسه ميعاد الجلسه ممكن اعرف الحكم ممكن يكون قد ايه علي مبلغ ٤٤٠٠٠
مهما كان المبلغ العقوبة ان تتغير للاسف… هي كده كده حبس من يوم لثلاثة سنوات حسب قرار القاضي … علشان كده يقولوا لو سرقت اسرق جمل 😃
مساء الخير أنا مش فاهمه معلش
دلوقتي جوزي هياخد من بنت خالتي فلوس وعايزه تتككتب وصل امانه يعني ومش فاهمين نكتبو ازي
لو سمحت معلش معا يا وصل امانه من وحدة بين طرفين يعنى ينفع ولا مش شرط ومعه صورة بطاقه
استاذ أحمد مساء الفل،،، الموضوع يعتمد على اقتناع القاضي، يستحسن استشارة محامي حتى يستطيع الاطلاع على جميع تفاصيل المسألة
طيب وفي ايه ورقيات تقدر تحفظ حقك غير وصل الامانه معاليك؟
أستاذ ماجد أهلا بحضرتك.. في الحقيقة أفضل وسيلة لحفظ الحقوق هي الشيكات، وعقوبة الاخلال بها هي نفس عقوبة وصولات الأمانة، لكن المشكلة انه ليس كل الناس لهم حسابات بنكية تسمح لهم باستصدار شيكات،.
لكن الشيكات قطعاً أفضل ... ولا يمكن الطعن على صحتها بسهولة...
سؤال استاذي الفاضل انا دلوقتي عايز ادي فلوس لصديق ليا مبلغ عشان يشغله وعايزه يشغله لمدة ثلاث سنوات وهاخد منه المبلغ بعد الثلاث سنوات بكدة يبقي الايصالات مالهاش لأزمة
عملاً ،،،، طبعا لها لازمة،،،، ممكن تستخدمها لحفظ حقك بس المهم تتكتب كويس مع مراعاة الضوابط التي ذكرتها في الفيديو ..|. بالتوفيق إن شاء الله 🤲🏼
عملاً ،،،، طبعا لها لازمة،،،، ممكن تستخدمها لحفظ حقك بس المهم تتكتب كويس مع مراعاة الضوابط التي ذكرتها في الفيديو ..|. بالتوفيق إن شاء الله 🤲🏼
ممكن اعرف حاجه في حد عندي دخل جمعيه معايا وانا كنت مضيته علي إيصال امانه وبعد ما قبض نصب عليا وانا مكنتش ماليه الايصال كله دلوقتي اعمل ايه
كملي الايصال بنفس نوع القلم وبتاريخ قريب وقدميه للجهات
بعد ازنك هو ممكن اكتب الوصل بين اثنين بس انا وهو بس مفيش طرف ثالث هل ينفع كدا
حيبقى فيه ثغرة قانونية كبيرة ممكن تفقده قيمته
يعني جوزي هياخد من بنت خالتي فلوس
هو يكون اول خانه وبنت خالتي تاني خانه وأنا اخر خانه صح كده
تمام صح 👍🏽
لو سمحت في واحدة مضيالي وصل من سنة علي بياض وانا عاوزة اشتكيها بس مش معايا نفس القلم اعمل ايه
ومفيهوش تاريخ خالص
حاولي نفس القلم ... لان ده مهم،،،،
يجب وضع تاريخ حديث لا يبعد اكتر من ثلاثة سنوات عن التاريخ الحالي
سوال هوا كتابه التاريخ الي هتفق عليه انا والي هياخد مني الفلوس ده اني يرجعها ف الميعاد الي اتفقنه عليها ده نسيبه فاضى
لا أفضل دائماً أن يتم كتابة التاريخ حتى لا يتم الطعن عليه بالصوريه
لو وصل مكتوب كل ماذكر ماعدا خانة الشخص التالت المستلم كده ملوش قيمة وهل لازم محامي للمطالبة بوصل الأمانة ولا اية الإجراءات
هنا يكون في مجال للطعن على وصل الامانه… وفي هذه الحالة بالذات يفضل الاستعانة بمحامي حتى يحاول سد هذه الثغرة
جودة الفيديو تسحنت يا استاذ👏🏻 مزيد من التقدم👍🏻
علاء سلاير Alaa Slayer الف شكر أستاذ علاء
وبالنسبه للتاريخ؟
حضرتك تقدر تكتب التاريخ اللي انت عايزه بس خليك عارف ان بعد ٣ سنين بتقادم دعوى خيانة امانه، يعني مش حتقدر ترفعها،،، شكرا على المتابعه 😍🙏🏾
@@aaroussy جزاكم الله خيرًا
@@attallaabdelaal1785 جزانا واياكم، الف شكر على المتابعة
السلام عليكم
ابن عمي كاتب علي اخويا وصل أمانة من عشر سنين وهو دلوقتي بيهدد اخويا بتقديم الوصل واخويا مضي بس وابن عمي هو اللي كتب بيانات الوصل
والوصل باسم عمي وعمي توفي من سنة ونص
محتويات الوصل. إن عمي اعطي المبلغ لاخويا يوصلها لابنة الثالث وعمي وولاد عمي مقيمين في الإسماعيلية واخويا مقيم في القاهرة
لو سمحت ممكن توضحلي موقف اخويا لو أتقدم الوصل وجزاك الله خيرا
Nermen Hamdy دعوى وصل الامانة بتتقادم بمضي ٣ سنوات فلو التاريخ على الوصل يرجع لعشر سنوات يبقى الوصل مالوش لازمة... وممكن كمان اخو حضرتك يدفع بعدم منطقية الوصل ... لا مش معقول واحد ساكن في محافظة تانيه يوصل امانه ما بين اتنين ساكنين مع بعض (صورية وصل الامانة) موقف اخو حضرتك قوي ويقدر يتمسك بدفوع كتير
@@aaroussy الوصل مش مترخ هل موقف اخويا قوي
Nermen Hamdy متوسط... لازال يستطيع الدفع بصورية الوصل
انا من القاهره
أعطيت محام مبلغ كبير من المال
بموجب ايصال امانه
الرقم القومى غير مذكور فيه تاريخ الميلاد
لاتوجد بصمته على الإيصال
الطرف الثالث ابنتى انا صاحب الفلوس
والمدين يماطل فى سداد الدين وبيقول روح اشتكينى
فهل الإيصال بهذه الطريقه يفقد أهميته
ما هى أتعاب المحامى جمله وتفصيلا حتى الحصول على كل المبلغ
وما هى المده التى ستنقضى حتى الحصول على كل الفلوس التى مثبته فى إيصال الامانه
ارجو افادتى وشكرا
المبلغ كبير مش صغير
ولم احصل منه على صوره بطاقته
وقام بتغيير محل إقامته معروف لدينا
ومكتبه مازال موجود
تحريرا فى 17/3/2021
لو سمحت انا مضيت لتاجر على وصولات امانة مقابل انى اخد منه بضاعة وبعد ما اتفقنا على البضاعة ومضيت له على وصولات الامانة وبصمت عليها فوجئت ان البضاعة اتغيرت ومردتش استلمها وبعد فترة فوجئت ان عليا سنة سجن ايه العمل وكيف اتجنب العقوبة
مشكله للاسف... لازم تثبت ان وصولات الامانة صورية وانها كانت لضمان سداد بضاعه معينه وده عن طريق استغلال الثغرات القانونية الموضحة في الفيديو ... انه يكون استخدم اكثر من قلم او التاريخ تمت اضافته او عدم معقولية الشخص المطلوب تسليم الامانه اليه ... قلبي معاك
@@aaroussy طب لو انا معايا ورقة البضاعة والمحاسب اللى كاتبها هو اللى كاتب وصل الامانة وانا ماضى وباصم بس وكاتب بنفس القلم وفيها كافة التفاصيل بالمبالغ اللى كنا متفقين انها هتدفع
دى ممكن تكون ثغرة اثبت من خلالها مدنية العلاقة
ممكن رقم تليفونك
WhatsApp 01115315370