Renungan Harian Toraya (ReHaT) - 15 Juli 2024

TANGNGIA PANINGOAN TU PUANG MATUA
Tuhan Bukan Permainan
(2 Samuel 6:1-12)
Iatonna den pa sibitti’, mintu’ ki’ den ta ampui sia umpaningoi paningoan. Buda rupanna tu paningoan ta, susinna: gasing, pelle’, raga, suling, passayang, goli’, sia buda pa to. Mintu’ tomai paningoan umpamasannang penaanta belanna ma’din ki unnatoi’ tu paningoan ta situru’ naalanna penaanta. Iake susi to, apara siumpu’na pa’basanta lanmai Sura’ Madatu?
Iate pa’basanta untuna’ kamaleanna Daud sisola pa’tondokan Israel umpalele pattin-Na Puang Matua. Ia mo te patti iate, tu mendadi tanda kama’diorenan-Na Puang Matua sisola mintu’ taunna. Umba inan tu na nai te patti, inde duka mo to tu nanai payan mintu’ tanda passakke-Na Puang Matua. Tanda passake iamoto tu na kamali’ Daud anna urunganni male unnalai tu pattin-Na Puang Matua lanapalengkai’ lako Yerusalem. Kasalan tu Daud belanna na tiro paningoan tu patti iato, na posaba’i untengkai atoran-Na Puang Matua kumua iatu patti iapi na dipalengka’ ke dibullei sia tae’ na ma’din di parumbui lima (Bil 4:15). Mintu’na tu na pondok Puang Matua tang ma’din la ditengkai kalo’, ondongpi la di tiro pangingoan. Untengkai kalo’ atoranna Puang Matua umpabu’tu bala’ kasanggangan sia kamatean.
Iate pa’basanta mepakilala kumua tangngia paningoan tu atoran-Na Puang Matua. Tang ma’din tu umpogau’ punalai temai pengkarangan dipake lan kemenonmban. Ondong pi katuoanta, tae‘ nama’din dipake sala belanna iate kale sia katuoanta iamo tanda kamala’biran-Na Puang Matua. Lan mintu’na tengka ke’de’ ta, inang sipatuki’ tu tontong umposangka’ atoran-Na Puang belanna mintu’ la dipomelona ma’din dikabu’tui diomai sukaran Aluk-Na Puang Matua. Lan panganta’na Penaa Masallo’ tu la umpatu’tun ki’ lako kapaissanan tongan lako sukaran aluk-Na Puang Matua. Amin.

[@bedokliu353]

Maka berhati2lah terhadap niat baik kita yang sebenarnya TIDAK sesuai dengan kehendak Tuhan. Bukan kehendak kita meskipun itu adalah hal baik, tetapi kehendak Tuhan yg harus nyata walaupun itu menyakitkan bagi umat-Nya.
Mari belajar dari peristiwa matinya Uza.

[@lahairoichannel]

Amin Firman Tuhan