Magida El Roumi lamenting the death of Ihsan El-Monzer - ماجدة الرومي ترثي إحسان المنذر

شو بوجعو القلب هالكبار بس يرحوا، مابتعود تعرف مع غياب كل واحد منن هن اللي بيروحوا او نحنا.. ولابتعود تعرف اذا الغياب غياب أو حضور أكبر.. واذا الحضور حضور أو غياب اكبر..
أديش انصدمت اليوم واديه وجعني قلبي بس عرفت ان رفيق دربي الطويل المبدع الإستاذ إحسان المنذر رحل عن هالدنيا...
كان بعد بكير يا إحسان....
لا عم صدق إنك رحت، وما فيني قلك أديش متفاجئة،
لا عم بقدر وقف عيني تبكي.. ولا إيدي ترجف.. ولا قلبي يحترق، ويدق كأنو عم يركض فيي، مش عم بقدر لحقه...
غالي على قلبي.. ايه غالي كتير
مبدع.. ايه مبدع كبير.
لا كلمات اللي لحنتها متل الكلمات..
لا وداع ولا مطرحك بقلبي ولا نبع المحبة متل باقي الأغاني...
اعمالك إلها خصوصية كبيرة، هي ماتشبه شغل حدا،
كنت وراح تبقى حجر أساس بكل حفلاتي، وعمود فقري لكل مسيرتي الفنية..
إيمتا غنيت أنا يا إحسان وماكنت انت!؟
كان غيابك حضور دايم فيي..
ياهالمبدع الكبير شو بدي قلك! اني مضطربة لا مش هاي هي الكلمة... الكلمة اكبر من هيك بكتير.. بس يمكن انا مش عارفة شو بدي قول..
يمكن احسن شي قلك نام بسلام، هاي سنة الحياة كلو رايح..
خلي هالدنيا تحكي عنك مع كل طلعة شمس..
تحكي عن خلودك...
خلي كل قلم بدو يحكي عن ابداعات الاغنية اللبنانية يوقف كتير ويحلل كتير بأعمالك الحلوة الجميلة الملهمة الرائعة المقطوفة من فوق...
وحتى نلتقي ع دروب ربنا يا إحسان اسمحلي تقبل مني شكري العميق..
وعرفاني بالجميل..
لكل عمل رائع قدمتلي ياه..
واحترامي الكبير ،وتقديري الكبير..
وان شاء الله اليوم ربنا يكون عم يفتحلك أبواب الجنة اللي انت بتستحقها عن جدارة، او يكون عم بيضمك لتلحن لهالملايكة احلى الالحان بالسما...
واسمحلي قدم لعيلتك تعازيي طالعة من نص قلبي، انو يتعزوا برحمة ربنا ويتأكدوا إن نفسك بالسما..
ماجدة الرومي
٣آب أغسطس٢٠٢٢