ازاي تتغلبي على كيد النرجسي

ازاي تتغلبي على كيد النرجسي ؟
النرجسي كياد فعلا زي الست الكيادة والعياذ بالله ، وطول الوقت يغيظ فيكي خصوصا لما يكون متغاظ منك وانتي قويتي ومش عارف يمسكك من حتة ولا عارف يضغط عليكي ولا يرجع سيطرته عليكي فتلاقيه بيعمل حركات غبية زيه ومفقوشة وهو فاكر نفسه اذكى اخواته زي مابيقولوا ، المهم انها بتكون حركات غبية ومع ذلك انتي بتخيل عليكي أحيانا وبتتغاظي وممكن يبقالك رد فعل فينبسط ويكرر التصرف كل شوية عشان ياخد وقود وفي نفس الوقت ينبسط انه لسة له تأثير عليكي . الحركات دي زي ايه؟ مثلا يبص ع البنات اللي لبسها مش تمام طول مانتوا خارجين مع بعض وممكن كمان يعلق تعليق يغيظك ،او انه يهمل نفسه ويبقى قذر لمجرد انك نظيفة جدا ومش بتستحملي القذارة او انك عندك حساسية انف او جيوب انفيه فيقرفك ، وممكن يعمل صوت وهو بياكل او يتكلم وفي بقه اكل لانه عارف انك بتقرفي ودايما تنبهي على اطفالك مايعملوش كدة ، او انه يقرفك في النوم كل ماتروحي في النوم يصحيكي ، او انه لما تخرجوا سوا يسبقك فلما تقولي له يهدي خطوته يهديها لحد مايبقى وراكي ولو انتي أصلا مستعجلة وبتمشي بسرعة هو يقول لك تعبان مش قادر امشي ، او مثلا يعرف انك بتحبي اكلة معينة ويمنعها أصلا من البيت لمجرد انه يضايقك وممكن يحرم نفسه منها عشان يضايقك ، لو انتي مش بتحبي الصوت العالي يفتح التلفزيون ويعليه ع الاخر ، لو لقاكي مندمجة مع أي برنامج ع التلفزيون يغيره ، لو قعدتي ترتاحي دقيقتين يدور لك على حاجة يقومك بيها ،...... حاجات كتير لو قعدت أقول ميت ساعة مش حخلص ولو حكيتي لحد الكلام دة حيقول عليكي تافهة ومش لاقية حاجة تقوليها وعيب تقولي على جوزك كدة وحاجات كدة وفوتي وعدي وكبري دماغك ودة لانهم مش فاهمين أي خلفيات أصلا عنه.
المشكلة الأكبر من كدة ان انتي أصلا بيكون رد فعلك دايما انك تعترضي وتحسسيه انك قرفانة وانك مش قابلة اللي بيعمله وبعدين الموضوع يكبر وندخل في غضب نرجسي واسقاط وجاسلايتينج ويختم بصمت عقابي وهو أصلا بيعمل الحركات دي عشان يوصل لمعركة وياخد وقود
طيب المفروض انك تعملي ايه عشان توقفي كل دة ؟ تعامليه زي مابتعاملي الطفل بالظبط.
شفتي لما يكون ابنك عنده سنتين او ثلاثة ويشبط في حاجة مش بتاعته تلاقي امك تقول لك الهيه بحاجة تانية او لما الطفل يقعد يعيط ويزن او يعمل أي تصرف انتي تقولي له عليه ماتعملوش يقوم يعمله ويبص لك يشوفك شايفاه ولا لا وجدته تقول لك اعملي نفسك مش شايفاه وهو حيبطل لوحده ، هو هو نفس التصرف بيتعمل مع النرجسي لازم تحسسيه انك مش شايفاه مش شايفة التصرف اللي بيحاول يغيظك بيه تتغافلي يعني تعملي نفسة مغفلة ومش فاهمة وهو حيفضل يعيد التصرف كام مرة عشان تشوفي وانتي برضه مش شايفة حتكون النتيجة مبهرة ، حالة بتقول لي كان كل يوم ماينيمهاش طول الليل كل مايصحى او يقلق لازم يقلقها وهي تصحى تتخاتق وحرام عليم واتقي الله وهو طبعا ينكر ،المهم قلت لها ماتعلقيش ولا تحسسيه انك قلقتي أصلا كأنك واخدة منوم ومش حاسة ،عمل أيه صحي وخرج برة الغرفة اللي نايمين فيها وعمل كام تليفون وهو واقف على باب الغرفة ويزعق ويضحك وعامل فرح ع الباب وهي ولا هنا الصبح لما لقاها مش بتتخانق ولا بتقول له صحيتني راح هو قال لها مانمتش طول الليل عشان تتخانق ماتخانقتش ،شوية وقال لها هو انتي بتاخدي المنوم ؟ تخيلوا وبعدين بدأ ياخد المنوم وهي والدكاترة كانوا بيتحايلوا عليه ياخدوه ومكنش بيرضى تقريبا عشان يقلقها ،المهم اتخمد وخلصنا من الصحيان طول الليل ، طبقي بقى في كل حاجة بيضايقك بيها وطول الوقت تحسبني عشان ربنا يقويكي عليه