鹽鄉

音樂創作
詩畫鹽鄉
穿一雙淺拖仔，
掛一臺相機
攑一枝筆，提一塊板
我欲油畫鹽鄉的詩，翕著少年時的夢
我欲行過古早的漁港，
畫著小魚，畫著大船。
我嘛欲行過熟識的教堂，
畫著初戀，畫著青春。
我擱欲行過駁岸和魚塭，
畫著無言的鹽埕，
畫著鹹澀的數念。
水藍色 不平的海湧，
拋荒的傘頂，滄桑的沙崙，
紅色的火燒雲，
天生 注定， 自然 天成。
鹽鄉的色水是滄桑，毋免模特兒來粉妝
天頂飛著白翎鷥一隻綴一隻，不時嘩一聲，
吟著畫中日照的背影。
歸排遮風的麻黃仔親像徛衛兵，
暗光鳥是後勤。
王爺港，井仔腳，北門，
七股，青鯤鯓，將軍。
鹽埕收好的鹽山一堆擱一堆，
倒風吹著海湧 一陣連一陣，
內海仔插著蠔杙仔 一支過一支，
家家戶戶 蝦米曝塗，
鹹魚掛佇竹篙，遠遠鼻來淡薄仔臭臊，
暗頓是摻豆油的白飯，配沁鹹的虱目魚腸。
現流仔的三點仔，厚刺幼肉的土黃，
雖然無土魠仔滿載佇即陣，
千歲 代天巡狩，王船 紅火出庒，
期待 明仔載 竹排仔會滿載著歸籠的紅蝦仔 倒轉。
By泊紅塵107.05.11