تورته اقتصاديه للمبتدئين بأقل من نص تمن الجاهز❗بدون دقيق اسبونج❗وهنعمل الكيك الاسفنجي بالدقيق العادي

تورتة عيد ميلاد بنتي الرابع 🎉🎈🎈تورته بالاسبونج البيتي بالدقيق العادي بدون دقيق اسبونش جاهز👌تورته اقتصاديه تكفي 15فرد تورته فور سيزون/تورته نص فانيليا ونص شيكولاته👌
#هنا_صلاح
#تورته
#تورته_عيد_ميلاد
#تورتة_للمبتدئين
المقادير:
مقادير صينيه مقاس ١٨:
٣بيض+فانيليا
كوب وربع دقيق نشيل منه معلقه ونحط بدالها نشا ولو عاوزينها بالشيكولاته نشيل معلقه او اتنين ونحط بدالهم كاكاو خام
نصف كوب سكر
نصف كوب ماء
معلقه كبيره ممسوحه محسن جل
معلقه صغيره هرميه كيك شيف
مقادير صينيه مقاس ٢٠او صاج ٣٠×٤٠(بس سمكه هيبقي رفيع طبقه واحده للجاتوه مش هنقطعه لطبقات) ٤بيض+فانيليا
كوبايه ونص دقيق نشيل معلقه ونحط بدالها نشا
نصف كوب سكر +معلقتين كبار
نصف كوب مايه
معلقه كبيره محسن جل
معلقه صغيره بكينج بودر
مقادير صينيه ٢٤او ٢٥ او الصينيه المستطيله الوسط ٢٠×٢٥ او صاج ٤٠×٦٠ :
٧ بيضات +فانيليا
٢ وربع كوب دقيق +ربع كوب نشا
كوب سكر
كوب الا ربع ماء
معلقتين كبار ممسوحين محسن جل
معلقه كبيره ممسوحه بكينج بودر (كيس كيك شيف)
انا عملت مقدار صينيه ٢٥ بس علشان معنديش صينيه نفس المقاس عملته في الصاج المتاح عندي زي ما شوفتوا وعلشان عاوزه نص فانيليا ونص شيكولاته فقسمت المقدار ع اتنين والبيض اللي مستخدماه كبير علشان كده حطيت ٣بيضات بدل ٣بيضات ونص🤗لكن لو البيض حجمه مش كبير او عادي فحطي النص بيضه الزياده علشان هتفرق في هشاشه الاسبونش وارتفاعه
التسويه:
فرن مسخن مسبقا رف اوسط ع درجه حراره متوسطه من ١٨٠ل١٩٠ع حسب حراره فرنك و علي حسب سمك الكيك لو عملاه في صاج وسمكه رفيع للجاتوه بياخد من ١٢ل ١٥دقيقه لكن لو زي اللي عملته خد معايا ٣٣دقيقه فالفرن وع حسب كل فرن ممكن تزيد او تقل لكن لو عامله الكيك في صينيه عاليه او حله هياخد من ساعه الا ربع ل ساعه
التكلفه:
٦بيض ٦×٦=٣٦جنيه +٤جنيه فانيليا يبقي ٤٠جنيه
٢.٥ كوب دقيق (اقل من نص كيلو )مع الكيك شيف يبقي١٥جنيه
ربع كريمه ب٣٥جنيه الصوصات لو استخدمنا من كل صوص ب٥جنيه يبقي ٢٠جنيه
١٠جنيه محسن جل
كده يبقي ١٢٠ جنيه
وبالنسبه للسكر في كل بيت وبنستخدمه علطول ولو عملنا كيك بنحط كوبايه واكتر وعمرنا ما حسبنا تمنه 😂بس عالعموم نحط ١٥ولا ٢٠جنيه زياده
يبقي بالكتير اوي ١٤٠جنيه
علشان نشتريها من بره مش اقل من ٣٥٠جنيه ولو عالطعم احلي من بره والتورته كفت ١٥فرد قطع كبيره كمان 👌