(69) مقدمة سفر القضاة -حق وحقيقى

قلب الانسان قاسي .. ومن السهل انه ينسى احسانات الله وخيره
بعد موت يشوع وشيوخ اسرائيل اللي كانوا معاصرين ليه ..
ضل شعب اسرائيل وفسدوا زي أهل كنعان اللي طردوهم وده اللي خلى الله يتركهم للشعوب التانية..
احداث كتير هنتكلم عنها وندرسها في حلقاتنا الجديدة عن سفر القضاة..
عرفنا في الحلقات اللي فاتت ان الله كان امين جدًا لوعوده لشعب اسرائيل وبالفعل اداهم أرض كنعان عشان يسكنوا فيها ..
وكان المفروض بعد ما يشوع قسم الأرض على الأسباط ان كل سبط يكمل يفرض سيطرته على قطعة الأرض اللي من نصيبه .. ويحارب باقي الكنعانيين ..
ويشوع قبل ما يموت وصى الشعب أنه يتعلق بالله ويعبده من كل قلبه .. ومايعيش زي باقي الشعوب الوثنية اللي بسبب شرهم الله طردهم من أرضهم عشان يفتت الفكر بتاعهم ده.. ويزرع اسرائيل مكانهم بثقافة جديدة وخضوع لله ومن خلال اسرائيل يعلن الله نفسه لباقي الشعوب ..
وبالفعل عاش الشعب في مخافة الله كل أيام حياة يشوع وكل ايام شيوخ اسرائيل المعاصرين ليشوع..
وبيبدأ سفر القضاة عند النقطة دي من التاريخ .. بعد وفاة يشوع والشيوخ .. وبيغطي تقريبًا فترة 400 ل 450 سنة من بعد يشوع..
بيتلخص سفر القضاة انه بيشرح حالة الفساد والبعد عن الله اللي عاشها الشعب من بعد موت يشوع .. واللي تدهورت مع مرور الوقت اكتر واكتر..
لما تسمع كلمة قضاة او قاضي هنا في سفر القضاة مش المفروض تتخيل القاضي اللي بيبقى في المحكمة .. لكن ببساطة قاضي هو قائد للشعب .. وهو مش حاكم كمان بالمعنى المعروف للكلمة ..لكنه قائد في منطقة محددة في شعب اسرائيل عشان ينصره على أعداؤه..
القصة بتقول ان الشعب ترك الله وشابه في سلوكه وعبادته الشعوب الكنعانية اللي تخاذل عن طردهم من وسطيه بحسب أوامر الله .. وعشان كدة رفع الله حمايته من على شعبه .. وتركه لباقي الشعوب اللي حواليه عشان تستعبده .. وكان بعد فترة من العبودية دي يصرخ لله .. والله في رحمته يقيم من وسطيهم مخلص.. قائد يخلصهم من الأعداء .. والله كان بيأيده بروحه في دوره دة بس .. ويرتاح الشعب فترة من الزمن .. لكن يرجع تاني الشعب ينسى الله ويعبد الآلهة الوثنية للشعوب دي .. ويرجعوا يستعبدوا .. وتتكرر الدايرة دي مرات ومرات .. لكن مع الأسف حالة الشعب الأخلاقية كل مرة بتسوء أكتر ويبعدوا عن الله أكتر ..
ماتنساش تشترك في صفحتنا على الفيسبوك:
/ livingbreadlearning
وكمان تزور موقعنا الالكتروني:
www.livingbrea...
أضغط على الرابط دة للاشتراك في القناة وعشان تشوف باقي الفيديوهات
/ @livingbreadeg
وممكن كمان تتابعنا على الانستجرام من هنا:
/ livingbreadlearning
اهلا بيك في خدمة الخبز الحي
music from: bensound.com