الغزالة والصياد || أحمد عيسى ||

ضحكت وعيونها بتتعكز
وتداري دموعها المستورة ...
بانت في الصورة انها قادرة
وانها مش برواز في الصورة ...
بانت للعالم كمحارب
وبيهزم أعدائه بضحكة ...
ضحكت للعالم فانهزموا
والتزموا مكانهم قدامها ...
في عيونها تشوف بنت جريئة
قدرت تتخطى اللي وجعها ....
والروح موجوعة لكن رافضة
تظهر للعالم مكسورة ...
الروح مش قادرة لكن قادرة
ودي كانت هي الفذورة ....
كان فيه جواها حبال دايبة
وهموم في الروح كات محفورة ...
كات بنت جميلة وأمورة
وتشوفها تتوه جوة عنيها ....
كات يعني الدنيا مقاوحاها
مع ذلك عاملة اللي عليها ...
كان رمش عنيها مخبي كتير
والدنيا كتير عاكست فيها ...
كان فيها هموم م اللي تحير
والفرحة اللي بعمر قصير
كات خايفة تقرب نواحيها ...
هزيها يادنيا وعديها
وخديها في صف اللي معاكي ...
وان كانت مش جاية معاكي
فبلاش تبقي انتي اللي عليها ...
اديها من الفرح شوية
وفرحي قلبها ويا عنيها ...
خليها تحبك أو حتى
تفتكر انك بتحبيها ...
وان كانت صعبة أوي عليكي
ف في حالها ياريت بقى خليها ...
انسيها شوية أو افتكري
إن انتي كمان جاية عليها ...
ياعيوني اللي بتبكي عليه
أصلاً مانتش جايه ف باله ...
كان بس تحسي بشئ مسه
فتروحي وتسألي عن حاله ...
كان حبك طاهر وعيونك
بتواجه عنده وإهماله ..
العيب عالقلب اللي اداله
أكبر من حجمه ومن قيمته ....
قاعدة على سريرها وبتعيط
وبتحلف بتقول انا سيبته ....
أنا سيبته لكن سيبت مشاعري
عشمانة انها تبقى حبيبته ....
وياريتني ماشفتك ولا جيتك
ولا شوفتني ساكنة حيطان بيتك
ياللي انا عن نفسي انا بقيتك
أنا آسفة لنفسي اللي اتنازلت
وقالتلك يوم انا حبيتك ....
قفلت باب بيتها وكتبتله
معلش ماينفعش نكمل ...
أنا قلبي اتحمل فوق طاقته
وخلاص مش قادر يتحمل ...
حبيتك لكن بالوقت
شوفتك بعنيا بتتحول ...
وموافقة اديك فرصة أخيرة
ونرجع نتصالح ونكمل ...
لكن لو تقدر بالأيام
ترجع بالآخر للأول ؟ ....
متسول قرب من قلبي
قام خرج قلبي الحصالة ...
واداله مشاعر حقيقية
واداله حاجات كات متشالة ...
لعيون هتصني وتحميني
ولوجعي تكون روح حمالة ...
دخلني في حالة مجنونته
وشوية عرفت انه زبالة ...
وبإنه يادوبك كان صياد
وان انا كنت ف عينه غزالة ...
الحالة اللي انا فيها دي صعبة
والصعب بييجي وبيعدي ...
أنا قاعدة بفكر في البارح
وبجيب في الحاضر وبودي ...
والماضي بحاول اخليه
مش أكتر من كلمة ماضي ...
خلاني المتهمة بحبه
وف يوم إعدامي عمل قاضي ...
وعشان يتكرم على قلبي
قال غلطت فيا لكن راضي ...
وانا قلبي الغلطان ماغلطش
غير يوم ما اتجنن واشتاقله ...
أنا هنسى البارح لو ينفع
وهدور على قلب استاهله ...
على قلب يكون صاحب قلبي
وابقاله الطيب من أهله ....
عن حد ان فكرت في وجعي
يساعدني بجد اني اتجاهله ...
عن حد يكون واقف جنبي
من غير ما اضطر اني اندهله ...
البارح هدفنه بإيديا
وهقول لعنيا خلاص توبي ...
أنا مين في الدنيا شبه نفسي
من طيني وطينتي ومن توبي ...
أنا هكفر باللي هيوجعني
وهكفر عن كل ذنوبي ....
أنا همشي لنفسي في سكتها
وهكمل وياها دروبي ....
أنا هبقى لنفسي القابلاني
بمشاكلي وقرفي وبعيوبي ...
#شعر #الغزالة