Сэттиэлэ сонуннара 28

Чэ, саҕалаатыбыт!
Сэттиэлэ сонуннара
Ыам ыйын 27-с - бэс ыйын 2-с күннэрэ
- Өлүөхүмэ улууһугар, ойуур уота күүскэ туран, ыксаллаах быһыы-майгы биллэрилиннэ. Өрөспүүбүлүкэ быыһыыр сулууспата «өссө үс улууска уоту утары ураты туруктаах үлэ олохтонно» диэн суруйар. Чопчулаатахха, уоту утары итинник ураты турук Сунтаарга, Дьааҥыга, Тааттаҕа баар.
- Оҕо көмүскэлин күнүн көрсө «Полярные авиалинии» авиа хампаанньа Саха сиринэн көтүүгэ 50 бырыһыаннаах чэпчэтиини оҥордо. Чэпчэтии улахан киһи иккититтэн уон иккитигэр диэри саастаах оҕотун кытта бииргэ авиа билиэт атыылаһар буоллаҕына эрэ оҥоһуллар. Чэпчэтии улахан пассажирга эрэ көрүллэр. Чэпчэтиини 2024 сыл бэс ыйын 1-кы күнүттэн алтынньы 26-с күнүгэр диэри кэрчик кэмҥэ көтүүгэ туһаныахха сөп. Чэпчэтиилээх хайысхалар: Баатаҕай, Белай Гора, Эдьигээн, Зырянка, Муома, Ньурба, Өлүөхүмэ, Саккырыыр, Сааскылаах, Орто Халыма, Сунтаар, Тиксии, Депутатскай.
- Бэс ыйын 4-с күнүттэн «Дьокуускай-Аллараа Бэстээх» хайысханан сылдьар мотуордаах оҥочонон айан сыаната аҕыс мөһөөх буолла. Бу туһунан «ЛенаВодСервис» хампаанньа салайааччыта Борис Строев иһитиннэрдэ.
- Бүлүү өрүс орто уонна алын сүүрүгүн толорон биэриигэ ууну харайар Бүлүү ГЭҺиттэн бэс ыйын 4-с күнүгэр күнүс 14.00 чаастан сөкүүндэҕэ 1100 кууб ууну ыытан саҕалыахтара. Маннык үлэ навигация этэҥҥэ барарыгар туһуланан ыытыллар.
- Кэбээйи улууһугар бэс ыйын 6-с-8-с күннэригэр эдэр ыччат «Табыс» диэн култуурунай-үөрэтэр бэстибээлэ ыытыллар. Тэрээһин чэрчитинэн 6 араас куонкурустар уонна күрэхтэһиилэр буолуохтара. Манна өрөспүүбүлүкэ бары улуустарыттан, куораттарыттан, уопсастыбаннай хамсааһыннартан бастыҥ ыччат түмсэрэ күүтүллэр.
- Дьокуускайга «Азия оҕолоро» оонньуу күрэхтэһиилэрэ ыытыллыахтаах успуорт бөдөҥ эбийиэктэригэр өрөмүөн үлэтэ түмүктэнэнэн эрэр. Бэлэм 90-97 бырыһыан. Саха иһитиннэрэр ааҕыныстыба «толору түмүктэниитэ бэс ыйын саҕаланыыта» диэн суруйар. Оонньуу киининэн «Туймаада» стадион буолар, манна өрөгөйдөөх арыйыы сиэрэ-туома ыытыллыаҕа, чэпчэки атлетикаҕа, сахалыы ыстаныыларга күрэхтэһии түмүктүүр тэрээһинэ барыаҕа.
- Ил Дархан Айсен Николаев ХИФУ ректора Анатолий Николаевтыын VIII «Азия оҕолоро» успуорт норуоттар икки ардыларынааҕы оонньуутугар университет эбийиэктэрэ төһө бэлэмнэрин туһунан дьүүллэстэ. Манна күрэхтэһиилэр 2 тыһыынча 700 кыттыылаахтара олорор «Күрэсчиттэр түөлбэлэрэ» тэриллиэҕэ.
Ил Дархан бары эбийиэктэргэ өрөмүөн үлэтин бэс ыйын 10-с күнүгэр бүтэрэргэ сорудахтаата.
- Дьокуускайга сынньалаҥ пааркатын суолларын аспааллааһын бу сэттиэлэҕэ түмүктэниэҕэ. Үлэ, дьон сынньалаҥар мэһэйдээбэт курдук, түүнүн оҥоһуллар.
- Дьокуускайга Национальнай ойуулуур-дьүһүннүүр түмэлгэ «Айвазовскай уонна нуучча улуу маринистара» диэн быыстапка арылынна. Манна барыта 30 хартыына көрдөрүүгэ туруорулунна. Онтон 19-һа - Иван Айвазовскай киэннэрэ. Бастакы этээскэ Сильвестр Щедрин, Александр Орловскай, Платон Борисполец, Григорий Чернецов, Константин Круговихин, Александр Дорогов уонна Алексей Боголюбов хартыыналара турдулар. Иккискэ - Иван Айвазовскай улахан үлэлэрэ. Быыстапка бэс ыйын 1-кы күнүттэн балаҕан ыйын 1-кы күнүгэр диэри туруоҕа.
Чэ, этэҥҥэ буолуоҕуҥ! Кэлэр сэттиэлэ ситиһиилээх буоллун!