المقام المعتلي | كلمات عيضه الثبيتي | اداء شبل الدواسر

حي والله طاري الليل لادّف النهار
ليلً يدف الهواجيس و المخرج ملي
من مغيب الشمس في خاطري نار و شرار
شب نارً تصطلي فوق نارً تصطلي
راحت هجوسي تكافخ مثل شقر الحرار
يوم تكفخ بالجناحين فالارض الخلي
وان دعا الميقاف كل المواقيف اختبار
حسب مانقراه فالشافعي و الحنبلي
سنّد الشرهه عليّه تراني باختصار
اعرف حقوق المطاليق واعرف ويش اللي
صوتً يهز المنابر على عز وقار
لا تعدّه مثل صوتُ صفير البلبلي
من سمع بيتي يكمّله ويقلّي قرار
لو ما اقلّه ويش رايك وكمّل مايلي
من غلا اللي سلمه ارحب وزيد النار نار
نعتزيبه ويتعزوا ياربعي ياهلي
غن ياراسي ولا فالمواقيف اعتذار
ماخلي راسي وصدري بعد ماهو خلي
الطريق يمين في يمين لا ترجع يسار
والوعد في محفل حصانً وحزام ملي
لجل عبدالله بن سعود مالا صار صار
ليلة ً ماجالها لا شبيه ولا حلي
من غلاه يذعذع الطيب و يفوح البهار
محفلً من نوره الليل الاسود ينجلي
راسه وساسه مسنّد على الروس الكبار
جده عتيبي على ساس والخال هذلي
(لا تعزوا ابن سليم اعتزا و الدم حار)
وسالم الازرق من الطيب راسه ممتلي
مرحبا ترحيب يبقى على عز وعمار
عند من راسه على الطيب يطنخ ويغلي
رحّب وكمل وجمّل سعّود ابن نوار
والكرم والطيب قول وفعل لبو علي
ياكثر مايحرم ام الحوار من الحوار
يدبل السومه ولا همه السوق ان غلي
والصحيح الاد زاير هل الفعل القرار
القعود يبركونه على افطحة الطلي
من بني مجنون والمدح ينصاهم جهار
توْرد الهياب في يوم ميحات الدلي
الامور الكايده عندهم كبر الزرار
فعلهم يكتب و بالماس مطليً طلي
عز يالاد المقاطي متيّهت البكار
مقدم العتبان واهل المقام المعتلي
لا اعتلوا روس النشاما على قحص المهار
فعل الاد مقاط تضرب عليه الامثلي
عاد حنّا عتيبه اهل الفعل و الافتخار
شوق عين اللي زهتها الجواهر و الحلي
قد تولينا على المجد وأخذنا الفقار
والله اللي عزّنا والله الوالي ولي
عيضه الثبيتي