شرح وحدة الربط الحلقي (RMU) بالتفصيل مكوناتها و دورها في الشبكة الكهربية

ال Ring main unitهي واحدة من اهم الاجزاء في المنظومة الكهربية علشان كده النهارده هنعرف ايه هي ال Ring main unitو هنشرح تركيبها بالتفصيل و هنوضح دورها في الشبكة الكهربية.
ال Ring main unit او ما يعرف اختصارا باسم RMU او وحدة الربط الحلقي و Ring main unit دي بتستخدم في انظمة توزيع الطاقة الكهربية و بتستخدم لربط المحطات الفرعية ببعضها ضمن الحلقة الواحدة او ربط محول التوزيع الخاص بمبني معين بشبكة الجهد المتوسط و بتستخدم في تغذية محولات التوزيع لضمان استمرارية الامداد الكهربي و اجراء عمليات الصيانة من غير ما يحصل قطع للتيار الكهربي وحماية المحولات اللي متوصلة بالRing main unit في حالة حدوث مشكلة بالشبكة فهي باختصار بتغذي الاحمال من محولين مختلفين بحيث ان لو حصل مشكله في محول من المحولات ينقل التغذية و الاحمال على المحول التاني بحيث ميحصلش اي انقطاع في التيار الكهربي و بالتالي بتضمن استمرارية تغذية الاحمال حتى في حالة حدوث اعطال او صيانة لاحد المحولات.
و ال Ring main unit بتتكون بشكل اساس من مجموعة من المفاتيح الكهربية المغلقة و لكل مفتاح منهم ثلاث اوضاع و هما الفتح و الغلق و التأريض. و بما ان ال Ring main unit بتعتبر وسيلة تحكم في فصل و تشغيل المحول فدائما بتكون موجودة بجانب المحول مباشرة.
وفي الاغلب بنستخدم ال Ring main unit مع المحولات اللي بتكون قدرتها اقل من 5 ميجا فولت امبير.
وال Ring main unit بتصنف طبقا لنوع العزل المستخدم فيها فبتنقسم لثلاث انواع و هما:1) SF6 Ring main unit :و العزل المستخدم في النوع ده بيكون غاز سداسي فلوريد الكبريت (SF6) و ده بيستخدم في العزل في تطبيقات الجهد العالي.
2)اما تاني نوع فهو Air Ring main unit : والعزل المستخدم في النوع ده هو الهواء.
3)اما النوع التالت في العزل المستخدم في ال Ring main unit هو Solid Ring main unit .
و ال Ring main unit بتتكون من 3 خلايا و الخلايا دي بتكون عبارة عن خلية دخول و الخلية دي بيكون فيها كابل دخول جاي من محطة فرعية و الخلية الثانية هي خلية خروج و الخلية دي بيكون فيها كابل خروج رايح لمحطة فرعية تانية و الخلية التالتة و الاخيرة بتكون عبارة عن خلية محول بتحتوي على الفيوز اللي بيحمي المحول وفي Ring main unit بتتكون من 4 خلايا بحيث بيكون في خليتين دخول من محطتين مختلفين و خلية خروج و خلية المحول و ممكن يكون فيها خلية اضافية بتسمى بخلية القياس و الخلية دي بيكون فيها معدات قياس القدرة و الجهد و التيار. و ال Ring main unit في الاغلب بتكون اما 11 ك.ف او 22 ك.ف او 33 ك.ف على حسب جهد المحول و 630/1250 امبير و اقصي تيار تتحمله في حالة الشورت سيركت هو 21 ك.أ و زمن الانتقال اللي بتحتاجه علشان تنقل من المحول الاول للمحول التاني هو 3 ثواني و لكن ده مش دائما و لكن اغلبية ال Ring main unit بتكون بالمواصفات دي. هناخد الشكل اللي قدامنا ده كمثال و هنبدأ نشرح عليه مكونات ال Ring main unit فهنبدأ بأول حاجة و هي ال Load break switch او ما يعرف اختصارا باسم (LBS) وهو عبارة عن مفتاح يدوي بيستخدم في توصيل و فصل كابلات الدخول و الخروج لعمل الصيانة و اعادة التشغيل و في الشكل اللي قدامنا ده ال load break switch 630 امبير واقصي تيار يقدر يتحمله في حالة الشورت سيركت هو 25 ك.أ .
2) High Rapture Capacity Fuse او ما يعرف اختصارا باسم (HRCF) وده عبارة عن فيوز بيستخدم لحماية المحول من التيار العالي و بيكون قيمته 160 امبير في حالة المحولات 1500 ك.ف.أ في الشبكات 22 ك.ف و80 امبير لنفس المحول و لكن في الشبكات 11 ك.ف. أما في حالة المحولات 1000 ك.ف.أ فبتكون قيمته 125 امبير في الشبكات 22 ك.ف و 63 امبير في الشبكات 11 ك.ف و في حالة المحولات 500 ك.ف.أ فبتكون قيمته 63 امبير في الشبكات 22 ك.ف و 40 امبير في الشبكات 11 ك.ف. و لكن في حالة لو كان المحول قدرته اكبر من 1500 ك.ف.أ بيتم استخدام قاطع تلقائي (C.B) بدلا من استخدام سكينة الفصل (LBS) و الفيوز وده طبقا لاشتراطات الكود المصري و لكن لو شوفنا مواصفة شركة شمال القاهرة للكهرباء او شركة العاصمة فهنلاحظ ان من اول المحول 1250 ك.ف.أ بيتم تركيب قاطع (CB) بدلا من السكينة (LBS) و الفيوز.
3)Earthing Switch او ما يعرف اختصارا باسم (ES) و هو قاطع التسريب الارضي و ده بيستخدم لتسريب الشحنات المتبقية بعد فصل اللوحة لحماية القائمين على عملية الصيانة. Mechanical interlock (4 و هي حماية ميكانيكية بتستخدم ما بين load break switch و Earthing Switch بحيث انها بتضمن ان وقت ما يكون ال Earthing Switch مفتوح لازم يكون load break switch مغلق و العكس صحيح بحيث انها تضمن ان الاتنين ميكونوش مغلقين في نفس الوقت و بالتالي يحصل شورت سيركت و كمان بتستخدم لفصل load break switch في حالة قطع الفيوز. بالاضافة لان ال Ring main unit بتحتوى على اجهزة قياس و حماية زي voltmeter و KVAR meter لقياس ال reactive power و KWH meter و earth fault indicator و ده بيستخدم لكشف مكان الاعطال و عزلها و hygrostat و ده بيستخدم في تنظيم الرطوبة داخل ال Ring main unit.
و في حالة المحولات 1000 ك.ف.أ بيتم توصيل اجهزة القياس في ناحية الجهد المتوسط اما في حالة المحولات 500 ك.ف.أ بيتم توصيل اجهزة القياس في ناحية الجهد المنخفض.
وبكده يبقى احنا شرحنا كل حاجة خاصة بوحدة الربط الحلقي RMU و عرفناها و قولنا بتتكون من ايه ووضحنا دورها في الشبكة الكهربية.