سبب خفي لرائحة الكمكمة في المكيف، كيف اتجنبها، وطريقة العلاج

السلام عليكم ورحمه الله وبركاته اهلا بكم في فيديو جديد ومعاكم هاني النهارده هنتكلم عن حاجه سبق وتكلمنا عنها وهي كمكمه المكيفات او الريحه الكريهه اللي بتطلع من المكيفات هحكي لكم حكايه بسيطه هتفهموا منها نقطه كثير ما يعرفوهاش حتى من الفنيين
كنت مركب تكييف كان دايما ريحه الاوضه وهي مقفوله والتكييف شغال وحشه جدا كأن الاوضه فيها دخان
كلمت الفني اللي ركبه كذا مره وبساله عن الحل يقول لي نظف الفلتر والكلام اللي هو من جوه الصندوق ولو حد كنس الاوضه والتكييف شغال هيعمل كده برده، وكنت بنظف الفلتر واتاكد ان ما فيش تراب على التكييف ولا رطوبه جواه لكن بدون نتيجه
لكن في مره بعد ما جاب اخره معايا قال لي بص التكييف ما بيجيبش ريحه من بره التكييف بيتعامل مع الاوضه وبيقلب الروايح اللي فيها الكلمه دي انا خدتها منه بس فهمتها بطريقه مختلفه بدات ابص في كل اركان الاوضه ايه الحاجه اللي ممكن تكون بتعمل ريحه كمكمه او ريحه غير مقبوله ايا كان قربها او بعدها عن المكيف
توصلت وفكرت ان التكييف محطوط جنب الدولاب مباشره والدولاب على سطحه تراب
جبت المكنسه الكهربائيه وشديت كل التراب اللي على الدولاب وكل التراب اللي في كل حته في كل الاوضه فوق حلق الباب سلك البلكونه وحلق البلكونه ما خلتش ذره تراب في اي مكان في الاوضه ومن يومها وريحه التكييف بقت جميله وما فيش فيه اي مشكله علشان كده انا هقول لكم النهارده على كل الاماكن والاسباب اللي تعمل ريحه كمكمه بما فيهم السبب اللي كان عندي وكمان هقول لكم ازاي نمنع الروايح دي من الظهور اصلا من البداية، واخر الفيديو معلومه مهمه وخطوه سهله لكنها سحريه تابع معايا للاخر
نبدا خطوه بخطوه كده ونعرف ان اي ريحه في الاوضه بتعمل ريحه في التكييف يعني لو انت اكلت سمك او رنجه او اي حاجه من مين اللي بتعمل روايح نفاذه، والتكييف شغال بيسحب منها وبيفضل يقلب الريحه دي طول اليوم لحد ما تفتح الاوضه وتشغله فتره والاوضه مفتوحه علشان تتخلص من بقايا الروايح دي
التراب اللي موجود في الغرفه في اي مكان سقف الدولاب او النيش من اهم الاسباب ودي مش اي حد يقدر يعرفها ولا حد هيقول لك عليها بشكل مباشر، لانها تعتبر فكره من بره الصندوق
السجاد لو مش نضيف او في ريحه كمكمه او قديم وعايز يتغسل هيعمل برده معاك ريحه في المكيف والاوضه مقفوله
حتى الملابس اللي بنخرج بيها لو فيها ريحه عرق هتعمل معانا ريحه كمكمه في التكييف بعد ما يشد منها الريحه دي فالافضل انك تخلي الملابس اللي فيها ريحه عرق بره الاوضه اللي فيها المكيف لحد ما تجف وسبت الغسيل طبعا يكون مقفول لو هتسيبه في الاوضه والافضل انك تخرجه بره على الاقل وقت تشغيل المكيف
مش هقول لك انك ممنوع تشرب سجاير في الاوضه والتكييف شغال لان خوفك على الناس اللي عايشه معاك في الغرفه المفروض يكون اهم بكثير من حرصك على ان التكييف يكون ريحه الهوا بتاعته كويسه
السقف والجدران لو فيها رطوبه او عفن هتعمل معاك برده مشكله في ريحه المكيف وتعمل معاك مشكله اصلا صحيه فلازم تعالج الحاجات دي وتمنع ظهورها
طيب لو المكيف خلاص عمل ريحه، والفاس وقعت في الراس ونظفنا الاوضه كويس جدا السجاد والجدران والسقف والدولاب حتى النجف واللمض وغيرهم وخرجنا السبت الغسيل بره الاوضه والشماعه حتى دره في الدولاب نظفنا سقفها نعمل ايه بقى في المكيف
هنفك الفلاتر ننفضها الاول بفرشه من التراب وبعد كده نغسلها بفرشه ناعمة على خفيف بميه وصابون سايل ونسيبها تنشف
والكويل بتاع التبريد هنرش عليه ببخاخه ميه وصابون سايل برضو وبعد كده هنرش عليه ميه سخنه بس ببطء شويه علشان الحوض بتاع التكييف ما يتملاش قوي ويجيب ميه على البورده بتاعة الوحدة الداخلية، وممكن نستخدم علبة بلاستيك فاضية من بتاعه فيري الصابون السايل اللي زي دي، نملاها ميه سخنه ونشطف بيها الكويل والحوض
وكمان نفرك الحوض ونتاكد ان هو نضيف ما فيش فيه رواسب او طين ولو عرفنا ننظف المروحه بفرشه كويس والريشة وطبعا انا عامل فيديو على الموضوع ده هيظهر لك ليه الرابط دلوقتي
وهسيبه لك في الوصف اسفل الفيديو كمان
ونقطه تانيه مهمه جدا، ودي هدية الحلقة كل مره تشغل فيها التكييف فترة طويلة، اول ما تطفيه شغل امر كلين على الاقل ربع او نص ساعه علشان يطير اي رطوبه رقدت في التكييف وما تلمش تراب ولا تفضل موجوده وتعمل ريحه كمكنه، واللي ما يعرفش امر كلين ده فكرته انه بيشغل المروحه بس بتاعه الوحده الداخليه بدون ما يشغل الكمبريسور يعني التكييف بيطلع هواء او بيقلب الهوا اللي موجود في الاوضه بدون ما يبقى سطح الكويل بارد فبالتالي مش هيجمع اي رطوبه من الجو بالعكس ده هيفقد الرطوبه اللي موجوده فيه
وبالخطوات اللي قلنا عليها والنصايح دي نكون خلصنا الفيديو بتاعنا لايك بقى قبل ما تخرج وابعت الفيديو لكل اصحابك اللي عندهم تكييفات وخليهم يشتركوا في القناه والى اللقاء في حلقه جديده والسلام عليكم ورحمه الله وبركاته

[@qwqwasas3887]

عندى مشكله المكيف شغال بس الوحده إلى بره مش شغاله وسألت قالو أن الوحده عامله قفله ممكن تقولي إصلاحا ازاي

[@HanyMoh2017yt]

هو انا مش متخصص في المجال
وحتى لو متخصص مش هقدر افيدك
لانك لازم تجيب حد يفحصها
مش هتعرف تشتغل بايدك يعني

[@ShaymaaGallery]

ايه سبب التكييف يعمل ريحه وحشه عند درجه حرارة 28 ... وولكن اما اعمله 27 مبيظهرش ريحه خالص

[@HanyMoh2017yt]

دي بسبب انه بيفصل كتير على ٢٨ والرطوبة مع قفلة الباب بتزيد
لكن لما يشتغل ٢٧ او اقل، بيشتغل اكتر، والكويل بيكون بارد وقت طويل، وبالتالي الهوا بيعدي منه وبيمتص منه الرطوبة اللي بتطلع من جسمنا ونفسنا ومن الهوا
وبالتالي الهوا بيكون نقي ومفيش فيه بخار او رطوبة.
ولما الجو يبقى اقل حرارة على ٣٠ مثلا
وتعمليه ٢٦ حتى، هتلاقي نفس المشكلة
ووقتها التشغيل على وضع الرطوبة افضل

[@ShaymaaGallery]

@@HanyMoh2017yt الله يبارك لك ويعطيك الصحه .. ولكن التشغيل الجاف بيستهلك كهرياء كتير ؟؟ وافضل مشغلاه دايما ولا ساعات معينه واعمل الدرجه 27