ಸುಮ್ಮನೆ ಬರುವುದೇ ಮುಕ್ತಿ

ಸುಮ್ಮನೇ ಬರುವುದೇ ಮುಕ್ತಿ|ಪ|
ನಮ್ಮ ಅಚ್ಯುತಾನಂತನ ನೆನೆಯದೇ ಭಕ್ತಿ|ಅಪ|
ಮನದಲ್ಲಿ ದೃಢವಿರಬೇಕು ಪಾಪಿ|
ಜನರ ಸಂಸರ್ಗವ ನೀಗಲೇ ಬೇಕು|
ಅನುಮಾನವನು ಬಿಡಬೇಕು|
ನಮ್ಮ ಮನವ ಶ್ರೀ ಹರಿಗೆ ಒಪ್ಪಿಸಬೇಕು|೧|
ಕಾಮಕ್ರೋಧವ ಬಿಡಬೇಕು|
ಹರಿನಾಮ ಸಂಕೀರ್ತನೆ ಮಾಡಲೇಬೇಕು| ಹೇಮದಾಸೆಯ ಬಿಡಬೇಕು| ನಮ್ಮ ಕಮಲನಾಭನ ನೆರೆ ನಂಬಬೇಕು|೨|
ಮಂದಮತಿಯ ಬಿಡಬೇಕು|
ದೇಹಬಾಂದವ ಸಂದೇಹ ಬಿಡಬೇಕು| ನಿಂದಿಸಿದರೆ ಹಿಗ್ಗಬೇಕು|ಕೋಪ ಬಂದರೆ ಸೈರಣೆ ತಾಳಲೇಬೇಕು|೩|
ಗುರುವೇ ಶ್ರೀ ಹರಿ‌ ಎನಬೇಕು|
ಅಂಥ ಗುರುವೇ ಪರದೈವವೆಂದು
ತಿಳಿಯ ಬೇಕು|
ಪರವಸ್ತು ಒಲ್ಲೆ ಎನಬೇಕು|ದೇಹಸ್ಥಿರವಲ್ಲವೆಂತೆಂದು ತಿಳಿಯಲೇ ಬೇಕು|೪|
ವ್ಯಾಪಾರವನು ಬಿಡಬೇಕು| ನಮ್ಮ ಪುರಂದರವಿಠಲನ ನಂಬಲೇಬೇಕು| ಪಾಪರಹಿತನಾಗಬೇಕು|ಜ್ಣಾನದೀಪದ ಬೆಳಕಿನೊಳೋಡಾಡಬೇಕು|೫|